“वेष्ट पोइन्टको नर्सरीबाट ३.९१ जिपिएसम्मको यात्रा : बर्खा थापा-आत्मबल, अभिभावकत्व र अठोटको प्रेरणादायी कथा”

सानो अनुहार, हँसिलो स्वभाव, होचो कद तर आत्मविश्वासले भरिपूर्ण ति बालिका- बर्खा थापा। बाग्लुङ जिल्लाको बाग्लुङ नगरपालिका–१० मा स्थायी ठेगाना भएकी उनी अहिले बेनी नगरपालिकामा आमासँगै बस्दैछिन्। आमाको मुहारमा ममता छ, आँखामा सपना र हृदयमा अठोट-आफ्नी छोरीलाई उज्यालो भविष्यतर्फ डो¥याउने अठोट। यही अठोट र स्नेहको आधारशिलामा उभिएर बर्खाले बनाइरहेकी छिन् आफ्नै जीवनको एउटा अनुपम उदाहरण।

बर्खाले आफ्नो औपचारिक शैक्षिक यात्रा बेनीको न्यू वेस्ट पोइन्ट आवासीय मावि, बिरौटा स्थित नर्सरी कक्षाबाट सुरु गरिन्। उनको बोल्ने शैली सानैदेखि फरक थियो। उनको आवाजमा आत्मविश्वास थियो, शब्दमा स्पष्टता र उपस्थितिमा ऊर्जा। चित्रकलामा रुचि, नृत्यमा लचकता र उद्घोषणमा -प्रभाव यी सबैले उनलाई भीडभित्र छुट्याउने विशेषता प्रदान गर्यो।

जिन्दगी सजिलो थिएन। आमा एक सानो व्यवसायमा संलग्न थिइन्। पौरख, माया र संघर्षको त्यो संसारमा हुर्किँदै गर्दा बर्खाले जीवनको मूल्य बुझिन्-जसले उनलाई अझै परिपक्व बनाउँदै लग्यो। विद्यालयमा हुने आन्तरिक परीक्षा हुन् वा विभिन्न प्रतिस्पर्धा, बर्खा जहिल्यै अग्रस्थानमा हुन्थिन्।

२०८० सालको माध्यमिक शिक्षा परीक्षा उत्तीर्ण, उनले वेस्ट पोइन्ट कलेजमा व्यवस्थापन समूहको अध्ययन सुरु गरिन्। फाइनान्स विषयलाई केन्द्रमा राखेर अघि बढ्ने निर्णय सानो थिएन। तर त्यो निर्णयमा अठोट थियो, “SEE भन्दा राम्रो नतिजा ल्याउनु पर्छ।”

वातावरण फेरिएको थियो, समय नयाँ, साथीहरू नयाँ, शिक्षकहरू नयाँ, तर उही स्कूल। पढाइको स्तर गहिरिँदै गइरहेको थियो र बर्खा पनि बिस्तारै उमेरले, अनुभवले र संघर्षले परिपक्व हुँदै थिइन्।

विद्यालयमा आयोजना हुने कार्यक्रममा मात्रै होइन, उनी अन्य संघसंस्थाहरूको मञ्चमा समेत उद्घोषकका रूपमा निखारिदै  गइन्। शब्दको सजावट, आत्मविश्वासपूर्ण आवाज, अनुशासित उपस्थितिले उनलाई नेतृत्वदायी व्यक्तित्व बनायो।

अन्ततः, २०८२ सालको कक्षा १२ को बोर्ड परीक्षामा उनले ३.९१ जीपीए ल्याउँदै म्याग्दी र धौलागिरी क्षेत्रमै अग्रस्थान ओगटिन्। यो केवल अंकको सफलता थिएन  यो थियो एक सानो छोरी, एक मेहनती आमाको सपना साकार भएको क्षण।

उनले पढ्ने मात्र होइन, खोज्थिन्,  पाठ्यपुस्तकसँगै अन्य स्रोतहरूमा डुब्थिन्। अध्ययन केवल कर्तव्य होइन, खोज र जिज्ञासाको प्रक्रिया थियो उनको लागि। यही अनुसन्धानात्मक शैली, यही निरन्तर अभ्यासले उनलाई सधैँ अगाडि बढ्न सघायो।

आज, उनले प्रमाणित गरिन्  “यदि सपना छ, आँट छ, साथमा अभिभावकको माया र आफ्नै लगनशीलता छ भने, संसारमा असम्भव केही छैन।”

बर्खा जस्ता विद्यार्थीहरू हाम्रो समाजका असल प्रेरणा हुन्। उनीहरू देखाउँदै छन्  उज्यालो भविष्य पुस्ता बनाउने बाटो विद्यालयका डेस्क, किताबका पाना र एक आमाको बलियो अँगालोबाट सुरु हुन्छ।

उनको आगामी शैक्षिक यात्रामा सफलता र समृद्धिको शुभकामना !