बेनीको न्यू वेष्ट पोइन्ट विद्यालयद्वारा बृहत् खेलकुद सप्ताह भव्य रूपमा सम्पन्न

समापन समारोहका प्रमुख अतिथि जिल्ला खेलकुद विकास समितिका अध्यक्ष सुमन श्रेष्ठले विद्यालयले गरेको बृहत् र व्यवस्थित खेलकुद कार्यक्रम सराहनीय रहेको बताउनुभयो। उहाँले न्यू वेष्ट पोइन्ट विद्यालयले जिल्लाको खेलक्षेत्रमा महत्वपूर्ण योगदान दिँदै आएको उल्लेख गर्दै आगामी दिनमा पनि जिल्ला खेलकुद विकास समिति विद्यालयका यस्ता प्रयासमा सदैव सहयोग गर्न तयार रहने प्रतिवद्धता जनाउनुभयो।

त्यसैगरी, विद्यालयका अभिभावक–शिक्षक संघकी अध्यक्ष तथा जिल्ला खेलकुद विकास समितिकी उपाध्यक्ष विष्णुकुमारी रोकाले खेलकुद केवल मनोरञ्जनको माध्यम नभई जीवनलाई अनुशासित, स्वस्थ र ऊर्जावान् बनाउने अभ्यास रहेको बताउनुभयो। उहाँका अनुसार खेलकुदले शरीरलाई मात्र तन्दुरुस्त राख्ने होइन, अनुशासन, सहयोग, सहनशीलता, समूह भावना, नेतृत्व क्षमता र आत्मविश्वास पनि विकास गराउँछ।

कार्यक्रमका खेलकुद विभाग प्रमुख तथा खेल शिक्षक दिपेन राईले विद्यार्थीहरूलाई विद्यालयको मैदानमा मात्र सीमित नराखी जिल्ला, प्रदेश र राष्ट्रिय स्तरमा समेत सहभागिता जनाउने सपना बोकेर विद्यालय अगाडि बढिरहेको बताउनुभयो। उहाँका अनुसार यस वर्षको खेलकुद सप्ताहमा कक्षा ३ देखि कक्षा १२ सम्मका करिब ७ सय विद्यार्थीले विभिन्न खेलकुद प्रतियोगितामा सहभागिता जनाएका थिए। प्रतियोगितामा चेस, टेबल टेनिस, सिनियर भलिबल, कराते, तेक्वान्दो, हाई जम्प, लङ जम्प, ट्रिपल जम्प, ज्याभलिन थ्रो लगायतका ट्र्याक तथा फिल्ड खेलहरू समावेश गरिएको थियो।

औपचारिक कार्यक्रमपछि ट्र्याक खेलहरूको फाइनल चरण सञ्चालन गरिएको थियो। अभिभावकहरूका लागि पनि विशेष खेलकुद प्रतियोगिता आयोजना गरिएको थियो। विभिन्न खेलमा विजयी विद्यार्थी र अभिभावकलाई प्रमुख अतिथि र अन्य अतिथिहरूले पुरस्कार वितरण गर्नुभएको थियो।

समापन समारोहको अवसरमा मोंटेसरी र बाल विकास तहका साना बालबालिकाले आकर्षक नृत्य र ड्रिल प्रस्तुत गरेका थिए। सो अवसरमा तेक्वान्दो र करातेको काता प्रदर्शन तथा विद्यार्थीहरूको आकर्षक सांगीतिक प्रस्तुतिहरू पनि देखाइएको थियो। सम्पूर्ण विद्यार्थीको तर्फबाट कक्षा ११ की छात्रा अनिशा थापाले मन्तव्य व्यक्त गरेकी थिइन्।

कार्यक्रममा बेनी नगरपालिकाका शिक्षा अधिकृत कमल ढकाल, वडा नं. ७ का सदस्य सोहन श्रेष्ठ, गलेश्वर क्षेत्र विकास समितिका अध्यक्ष माधव रेग्मी, बेनी सामुदायिक माध्यमिक विद्यालयका प्रधानाध्यापक दीपक श्रेष्ठ, वेष्ट पोइन्ट एजुकेशन फाउन्डेसनका संस्थापक निर्देशकहरूलगायतको विशेष उपस्थित थियो।

कार्यक्रम वेष्ट पोइन्ट एजुकेशन फाउन्डेसन म्याग्दी प्रा.लि.का संस्थापक निर्देशक सुबासकुमार श्रेष्ठको अध्यक्षता, विद्यालयका प्रिन्सिपल डी.बी. दाहालको स्वागत मन्तव्य र +२ तहका भाइस प्रिन्सिपल कृष्ण जिसीको सञ्चालनमा सम्पन्न भएको वेष्ट पोइन्ट मिडिया हबले जनाएको छ।