बेनी, कात्तिक-१३, हिमपातका कारण अन्नपूर्ण आधार शिविर क्षेत्रमा समस्यामा परेका १५ जना विदेशीसहित ७२ जना पर्यटकहरूलाई सकुशल उद्धार गरिएको छ।
शसस्त्र प्रहरी बल आश्रित गुल्म गलेश्वरबाट प्रहरी निरीक्षक बिनोद पौडेलको नेतृत्वमा गएको सात जना शसस्त्र प्रहरी, तीन जना जनपद प्रहरी र स्थानीय उद्धारकर्मी इन्द्रसिंह शेरचनसहितको टोलीले पर्यटकहरूलाई उद्धार गरेको हो।
गुल्म प्रमुख प्रहरी नायब उपरीक्षक लीलाबहादुर भुजेलका अनुसार, १७ जना विदेशीसहित ७२ जना पर्यटकहरूलाई आधार शिविरबाट उद्धार गरी बिहीबार बिहान हुमखोला झारिएको हो। सबै पर्यटकहरू सकुशल रहेका जनाइएको छ।
भुजेलका अनुसार, हिउँले पदमार्ग पुरिएपछि बाटो बिराएका २० जनालाई डोरीको सहायताले उद्धार गरिएको हो। उद्धार टोलीले पदमार्गमा थुप्रिएको हिउँ पन्छाउँदै सबै पर्यटकलाई सुरक्षित स्थानमा ल्याएको बताइएको छ।
अन्नपूर्ण आधार शिविर जोड्ने मौरिस हर्जोग पदमार्ग खाली बनाएर सबै पर्यटकहरूलाई सुरक्षित स्थानमा ल्याइएको गुल्म प्रमुख भुजेलले जानकारी दिनुभयो।
वर्षा र हिमपातका कारण समुन्द्र सतहदेखि चार हजार एक सय ९० मिटर उचाइमा रहेको आधार शिविरमा गएका पर्यटकहरू बास बसेकै ठाउँमा रोकिएका थिए। हुमखोला, फुतफुते, साधीखर्क, गुफाँफाट, भुसकेत मेला र पञ्चकुण्डका होटलमा रहेका पर्यटकहरू सुरक्षाकर्मीको सहयोगमा फर्किएका छन्।
मंगलबार दिनभर हिमपात भएको उक्त क्षेत्रमा बुधबार मौसम सफा भए पनि बिहीबार बिहानदेखि पुनः हिउँ पर्न थालेको जनाइएको छ।
यता, म्याग्दीका प्रमुख जिल्ला अधिकारी बद्रीप्रसाद तिवारीले हिमपात र वर्षाका कारण हुन सक्ने सम्भावित जोखिमको मूल्याङ्कन गरेर सोमबारदेखि कात्तिक १४ गतेसम्मका लागि अन्नपूर्ण आधार शिविर भ्रमणमा रोक लगाइएको जानकारी दिनुभयो।
खोप्रालेक, घोडेपानी, पुनहिल र मोहरेडाँडालगायत क्षेत्रको भ्रमण नगर्न र सतर्कता अपनाउन प्रशासन तथा अन्नपूर्ण गाउँपालिकाले सार्वजनिक सूचना मार्फत अपिल गरेका छन्।
