बेनी, कात्तिक-४, म्याग्दीको सदरमुकाम बेनीमा आज नेपाली साहित्यका अमर प्रतिभा महाकवि लक्ष्मीप्रसाद देवकोटाको ११७ औँ जन्मजयन्ती विभिन्न साहित्यिक कार्यक्रमसहित भव्य रुपमा मनाइएको छ।
पुलस्त्य साहित्य प्रतिष्ठान, म्याग्दी साहित्यिक समाज र म्याग्दी सामुदायिक पुस्तकालयको संयुक्त आयोजनामा बेनीबजारमा सम्पन्न देवकोटा परिचर्चा तथा रचना वाचन कार्यक्रममा वक्ताहरूले देवकोटाको साहित्यिक योगदान, विचारधारा र मानवतावादी दृष्टिकोण बारे विस्तृत रूपमा चर्चा गरेका थिए।
कार्यक्रममा वरिष्ठ साहित्यकार तथा समालोचक रामप्रसाद सुवेदीले देवकोटालाई नेपाली साहित्यमा स्वच्छन्दतावादी र प्रगतिवादी धाराका प्रवर्तकका रूपमा व्याख्या गर्दै, उनका रचनामा मानवतावाद, प्रकृतिप्रेम र क्रान्तिकारिता झल्किने बताउनुभयो। उहाँले देवकोटालाई “पूर्वीय र पाश्चात्य दर्शनको अद्वितीय संयोजन” भएको पनि टिप्पणी गर्नुभयो।
त्यसैगरी वरिष्ठ साहित्यकार ध्रुवलाल शर्माले देवकोटाको जीवनमा देखिने त्याग, समाजसेवा र संवेदनशीलताको चर्चा गर्दै भन्नुभयो— “देवकोटा आफैँ भोकै बसेर पनि दुःखीका लागि सम्पत्ति समर्पण गर्ने समाज सुधारक थिए।”
विश्व नेपाली साहित्य महासङ्घ गण्डकी प्रदेशका संस्थापक अध्यक्ष प्रकाश अधिकारीले देवकोटालाई कवि मात्र नभई मानवता र आत्मबोधका दार्शनिकका रूपमा चित्रण गर्नुभयो।
त्यस्तै, म्याग्दीका वरिष्ठ साहित्यकार अजयमिलन श्रेष्ठले पछिल्लो समय म्याग्दीमा साहित्यिक गतिविधि सुस्ताउँदै गएको उल्लेख गर्दै अब म्याग्दीको साहित्यमा बाढी ल्याउनुपर्ने बताउनुभयो ।
कार्यक्रममा पुलस्त्य साहित्य प्रतिष्ठानका अध्यक्ष नवीनप्रकाश बानियाँ, नन्दकला हरिलाल स्मृति प्रतिष्ठानका संरक्षक गणनाथ पौडेल, मोहनबहादुर मल्ल साहित्य प्रतिष्ठान, पर्वतका अध्यक्ष जीवन मल्ल, सचिव चन्द्रबहादुर लामिछाने, साहित्यकार हरिप्रसाद पौडेल, शिव सस्मित, शैलेश श्रेष्ठ, तथा सञ्चारकर्मी कृष्ण जिसी लगायतले देवकोटाका रचनाहरू सम्पूर्ण मानवका लागि प्रेरणास्रोत रहेको उल्लेख गर्नुभयो।
वक्ताहरूका अनुसार देवकोटाको चेत ज्ञान, विज्ञान र दर्शनको संगम रहेको छ र उनका चेतनायुक्त रचनाले नेपाली साहित्यको गौरवलाई उच्च स्थानमा पुर्याएको छ।
कार्यक्रम म्याग्दी साहित्यिक समाजका अध्यक्ष ध्रुवलाल शर्माको अध्यक्षता, पुस्तकालयका साहित्य सचिव दीपक पौडेलको स्वागत मन्तव्य र साहित्यकार शिव सस्मितको सञ्चालनमा सम्पन्न भएको थियो।
स्मरण रहोस्, महाकवि देवकोटाको जन्म वि.सं. १९६६ साल कार्तिक २७ गते काठमाडौंमा भएको हो। उहाँले वि.सं. १९९१ साल मंसिर १५ गते गोरखापत्रमा पहिलो कविता प्रकाशन गरेर नेपाली साहित्यमा औपचारिक प्रवेश गर्नुभएको थियो। देवकोटाको निधन वि.सं. २०१६ साल भदौ २९ गते भएको थियो।
