म्याग्दी, असोज-२२, म्याग्दीको बेनी नगरपालिका–९ तुसारेपानीमा बुधबार दिउँसो एक बलेरो जीप दुर्घटना हुँदा १५ जना सवारमध्ये केही यात्रु घाइते भएका छन्।
जिल्ला प्रहरी कार्यालय म्याग्दीका अनुसार कुईनेमंगलेबाट बेनीतर्फ आउँदै गरेको ग २ च ५९३० नम्बरको बलेरो जीप आज दिउँसो करिब १२:१५ बजे ब्रेक फेल भएर करिब ११० मिटर तल बाजोबारीमा खस्दा दुर्घटना भएको हो।
घाइतेहरूलाई उपचारका लागि प्रदेश अस्पताल बेनी, म्याग्दी पठाइएको जिल्ला प्रहरी कार्यालयले जनाएको छ। जीप चालक धौलागिरी गाउँपालिका–४ निवासी ३४ वर्षीय चन्द्रे पुर्जालाई प्रहरीले नियन्त्रणमा लिएको छ।
प्रहरीका अनुसार उक्त जीपमा चालकसहित १५ जना सवार रहेका थिए। दुर्घटनाको विस्तृत विवरण संकलन भइरहेको प्रहरीले जनाएको छ।
प्रहरी सूचना अधिकारी प्रहरी निरीक्षक सागर पौडेलका अनुसार, घटनाबारे थप अनुसन्धान भइरहेको छ।
