यस वर्ष मुस्ताङबाट दशैंका लागि ३६ करोड रुपैयाँभन्दा बढीको भेडाच्याङ्ग्राको कारोबार भएको छ। भेटेरीनरी अस्पताल तथा पशु सेवा विज्ञ केन्द्र मुस्ताङका अनुसार मुस्ताङका कृषकले मात्रै ६ सय ७५ भेडा र ७ हजार दुईसय १ च्याङ्ग्रा बिक्री गरेका छन्। साथै मुगु, डोल्पा, जुम्ला र तिब्बत हुँदै कोरला नाकाबाट ल्याइएका भेडाच्याङ्ग्रा समेत समावेश गर्दा करिब ३६ करोड ५० लाख बराबरको कारोबार भएको केन्द्रले जनाएको छ।
केन्द्रका प्रमुख डा. लालमणि अर्यालका अनुसार, ‘‘दशैंमा बिक्री गर्ने भेडाच्याङ्ग्रा निकासी भइसकेको छ, मुस्ताङका किसानले गोठबाट बेचेर मनग्य आम्दानी गर्नुभएको छ।’’
कृषकले रोज्जा, रोमा तथा सानाठूला भेडा च्याङ्ग्रा उमेर र तौलअनुसार प्रतिगोटा २८ हजारदेखि ४० हजारमा बिक्री गरेका छन्। गत वर्षको तुलनामा यस वर्ष करिब एक करोड रुपैयाँ बढीको कारोबार भएको केन्द्रले जनाएको छ।
उपल्लो मुस्ताङ, लोमान्थाङ–१ का कृषक आङ्ग्याल गुरूङले मात्र यस वर्ष करिब १ करोड ५० लाख रुपैयाँभन्दा बढीको च्याङ्ग्रा बिक्री गरेका छन्। तर बजारमा मनपरी मूल्य गर्ने व्यापारीका कारण कृषक मारमा परेको उनको गुनासो छ।
उच्च हिमाली क्षेत्रका भेडाच्याङ्ग्रा जडीबुटी खाएर हुर्किएकाले स्वादिष्ट र स्वास्थ्यका लागि पनि लाभदायी हुने उपभोक्ताले बताएका छन्। दशैंपछि तिहारका लागि समेत करिब ४ देखि ५ हजार भेडाच्याङ्ग्रा मुस्ताङबाट बाहिरिने अनुमान गरिएको छ।
मुस्ताङमै सूचिकृत करिब एक सय कृषकका गोठमा हाल ५६ हजार च्याङ्ग्रा रहेको छ। किसानले बिक्री योग्य मात्र बजारमा पठाउने गरेको कृषि आधुनिकीकरण परियोजना कार्यान्वयन इकाइ कार्यालयले जनाएको छ। श्रोत : गोरखापत्र
