बेनी, पुष-२, म्याग्दीको परोपराकी संस्था ओमकुमारी शान्ति कोषको आठौँ साधारण सभा तथा चौथो साधारण सभा सम्पन्न भएको छ । अधिबेशनले हरिकृष्णा गौतमको अध्यक्षमा नयाँ कार्यसमिति सर्वसम्मत चयन गरेको हो । कोषको प्रथम उपाध्यक्षमा खमबहादुर थापा, द्वितीय उपाध्यक्षमा लोकबहादुर पुन, महासचिवमा विनय श्रेष्ठ, कोषाध्यक्षमा सन्दिप खत्री र सचिवमा दिपक श्रेष्ठ रहनुभएको छ ।
समितिको सदस्यहरुमा कृष्ण जिसी, दिलकुमारीकोषले प्रकाशन गरेको पुर्जा, सन्तोष गौतम, सचिन शाक्य, कमल खत्री, टकसरा राना, नन्दकुमार पाईजा, नेत्रराज सुवेदी र मिना राम्जाली रहनुभएको छ । म्याग्दी उद्योग वाणिज्य संघको हलमा शनिबार भएको कोषको आठौं साधारण सभा तथा चौंथो अधिवेशनको उदघाट्न प्रतिनिधि सभा सदस्य खमबहादुर गर्वुजा ( खम्विर) ले गर्नुभएको थियो । कार्यक्रममा शान्ति कोषले नियमित रुपमा प्रकाशन गर्दै आइरहेको सहयात्रा स्मारिकाको तेश्रो अंक सहयात्रा-३ को बिमोचन गरिएको छ कार्यक्रमका प्रमुख अतिथि प्रतिनिधि सभा सदस्य गर्बुजाले “सहयात्रा– ३” स्मारिकाको विमोचन गर्नुभएको थियो ।
गर्वुजाले स्थापनाकालदेखि ओमकुमारी शान्तिकोषको आर्थिक सहयोगबाट धेरैको ज्यान बचाउन सफल भएकोमा संस्थालाई धन्यवाद दिदै यस्तै कार्यलाई आगामी दिनमा निरन्तरता दिन आग्रह गर्नुभएको थियो । उहाँले आगामी दिनमा जिल्लाको स्वास्थ्य क्षेत्रको समस्या समाधान र पुर्वाधार निर्माणमा विशेष ध्यान दिने बताउनुभयो । उहाँले सोहि अबसरमा कोषको आजीवन सदस्यता समेत ग्रहण गर्नु भएको छ ।
गण्डकी प्रदेश सभा सदस्य हरि भण्डारी र रेशम जुग्जालीले ओमकुमारी शान्ति कोषको गरिमालाई आगामी दिनमा उच्च राख्दै अगाडी बढ्न कोषको समितिलाई आग्रह गर्नुभयो । उहाँले जिल्लाको स्वास्थ्य क्षेत्रमा रहेका समस्यालाई छिटो समाधानतर्फ ध्यान दिने जोड दिनुभएको थियो । साधारणसभामा नेपाली कांग्रेसका उपसभापति कर्णबहादुर भण्डारी (केवी) मंगला गाउँपालिकाका प्रमुख प्रशासकिय अधिकृत पुर्णबहादुर खत्री, म्याग्दी उद्योग वाणिज्य संघका अध्यक्ष बेलबहादुर कटुवाल लगायतले मन्तव्य राख्नुभएको थियो ।
संस्थाका प्रथम उपाध्यक्ष हरिकृष्ण गौतमको स्वागत, महासचिव लोकेश पुनमगरको प्रगति प्रतिवेदन र कोषाध्यक्ष विनय श्रेष्ठको आर्थिक प्रतिवेदन रहेको कार्यक्रमको संचालन सचिव सन्दिप खत्रीले गर्नुभएको थियो । ८८० जना आजीवन सदस्रय रहेको संस्थाले आर्थिक संकलन र कोषको प्राप्त ब्याजबाट हालसम्म २७९ जनाको उपचारमा आर्थिक सहयोग गरेको छ । कोषले छिट्टैनै २ करोड ५० लाख रुपैयाँको अक्षकोष घोषणा गर्ने लक्ष लिएको छ । अहिले कोषमा ४१ जना संरक्षक सदस्य रहेका छन् ।
