बेनी, असोज-२४, म्याग्दीको सदरमुकाम बेनीमा म्याग्देलीको पहलमा आयोजित रक्तदान कार्यक्रमबाट ३० युनिट रगत संकलन गरिएको छ।
शुक्रबार मोना कतार बहुउद्देश्यीय अक्षय कोषको आयोजनामा बेनी अस्पतालको प्राङ्गणमा सम्पन्न कार्यक्रममा प्रमुख अतिथि गण्डकी प्रदेशसभा सदस्य हरि भण्डारीले प्रवासी म्याग्देलीको सीप र अनुभवलाई जिल्लाको विकासमा उपयोग गर्नुपर्नेमा जोड दिनुभयो।
कार्यक्रममा बेनी नगरपालिकाका मेयर सुरत केसीले म्याग्दीमा रक्तदानप्रति चासो र सहभागिता बढ्दै गएको बताउनुभयो। त्यस्तै नेपाल रेडक्रस सोसाइटी म्याग्दी शाखाका सभापति अमर बानियाँले रगत अभावका कारण जिल्लामा कुनै मृत्यु नहुनु गौरवको विषय भएको बताउनुभयो।
रक्तदान कार्यक्रममा बागलुङका उपमेयर राजु खड्का, मोना अन्तर्राष्ट्रियका कोषाध्यक्ष नरेन्द्र फगामी र पत्रकार महासंघ म्याग्दी अध्यक्ष हरिकृष्ण गौतमलगायतले शुभकामना व्यक्त गर्नुभएको थियो।
कोषका अध्यक्ष बिक्रम कार्कीले १ करोडको अक्षय कोष स्थापना गरी कतारवासी म्याग्देलीको योगदानलाई सामाजिक सेवामा लगानी गर्ने योजना प्रस्तुत गर्नुभयो।
कार्यक्रमको अध्यक्षता अध्यक्ष कार्कीले, स्वागत कोषाध्यक्ष रमेश पौडेलले र सञ्चालन सचिव तिलु शर्मा पौडेलले गर्नुभएको थियो।
सोही अवसरमा ८५ पटक रक्तदान गर्ने बेनी नगरपालिकाका मेयर सुरत केसी र आजीवन सदस्य भिमनाथ शर्मालाई विशेष सम्मान गरिएको थियो। रक्तदान कार्यक्रममा सहभागीहरूलाई ढाका टोपी र सम्मानपत्र प्रदान गरिएको थियो।
