बेनी, असोज-६, म्याग्दी सदरमुकाम बेनीको कालीपुल बसपार्कमा यात्रु सहायता कक्ष स्थापना गरिएको छ। चाडपर्व नजिकिँदै गर्दा यात्रुलाई लक्षित गरी जिल्ला प्रहरी कार्यालयले ट्राफिक कार्यालय परिसरभित्र सहायता कक्ष सञ्चालनमा ल्याएको हो।
प्रहरी नायव उपरीक्षक सूर्यबहादुर थापाका अनुसार दसैँ, तिहार र छठ पर्वभर सहायता कक्षमा सुरक्षाकर्मीहरूको नियमित उपस्थिति रहनेछ। यात्रुलाई सहज र सुरक्षित यात्रा गराउनका लागि मुस्ताङ जाने आउने तीर्थयात्री, पर्यटक तथा यातायात व्यवसायीलाई सहयोग गर्ने उद्देश्यले यो कक्ष स्थापना गरिएको हो।
यात्रुको सहजीकरणका लागि मालिका गाउँपालिकाको केन्द्र दरवाङमा पनि अर्को सहायता कक्ष सञ्चालन गरिने प्रहरी नायव उपरीक्षक थापाले जानकारी दिनुभयो।
उद्घाटन कार्यक्रममा जिल्ला समन्वय समिति म्याग्दीकी कार्यवाहक प्रमुख डिलकुमारी खत्री र प्रमुख जिल्ला अधिकारी बद्रीप्रसाद तिवारीले चाडपर्वको समयमा सुरक्षित र सहज यात्रा सुनिश्चित गर्न यातायात व्यवसायी र सुरक्षाकर्मीलाई आग्रह गर्नुभयो।
जिल्ला ट्राफिक प्रहरी कार्यालय म्याग्दीका प्रमुख प्रहरी सहायक निरीक्षक विशाल परियारले सहायता कक्षसँगै दुर्घटना न्यूनीकरणका लागि नियमित जाँचलाई निरन्तरता दिइरहेको बताउनुभयो।
