अन्नपूर्ण आधार शिविर पदयात्रामा पूर्ण रोक, वर्षा र हिमपातका कारण पर्यटक फसे

म्याग्दी, कात्तिक-११,  निरन्तर वर्षा र हिमपातका कारण अन्नपूर्ण आधार शिविर (एबीसी) पदयात्रामा पूर्ण रोक लगाइएको छ। पदयात्रा मार्गका विभिन्न स्थानमा हिउँ र पहिरोले बाटो अवरुद्ध भएपछि केही पदयात्री तल झर्न र माथि उक्लिन नसकी बीचमै फसेका छन्।

उनीहरूको उद्धार तथा सहजीकरणका लागि नेपाल प्रहरी, सशस्त्र प्रहरी बल र स्थानीय उद्धारकर्मीहरूको संयुक्त टोली परिचालन गरिएको छ।

स्थानीय उद्धारकर्मी इन्द्र शेरचन थकालीको नेतृत्वमा गएको टोली अन्नपूर्ण गाउँपालिकासँग समन्वय गर्दै उद्धार कार्यमा जुटिरहेको छ। शेरचनका अनुसार विभिन्न स्थानमा फसेका पदयात्रीहरूको अवस्थाबारे लगातार जानकारी आइरहेको छ र प्राथमिकता दिएर उद्धार गरिने तयारी भइरहेको छ।

यसैबीच, अन्नपूर्ण गाउँपालिकाले सुरक्षाका दृष्टिले हालका लागि सबै पदयात्रा गतिविधि रोक्न आग्रह गरेको छ। आवश्यक सहयोग वा सूचना चाहिएमा नजिकको प्रहरी कार्यालय, अन्नपूर्ण गाउँपालिकाका प्रतिनिधि, वा प्रहरी कन्ट्रोल १०० नम्बरमा सम्पर्क गर्न समेत अनुरोध गरिएको छ।

यसैबीच गण्डकी प्रदेशका उच्च हिमाली तथा पहाडी भूभागमा वर्षा र हिमपातको सम्भावना रहेको भन्दै जिल्ला प्रशासन कार्यालय, कास्कीले सतर्कता अपनाउन पदयात्रामा जाने पर्यटकहरुलाई अनुरोध गरेको छ।

जल तथा मौसम विज्ञान विभागको पूर्वानुमान अनुसार साेमबार देखि भाेली (बुधबार )सम्म हल्कादेखि मध्यम वर्षा र उच्च पहाडी क्षेत्रमा भारी हिमपात हुन सक्ने भएकोले पदयात्रा र पर्यटनसम्बन्धी गतिविधिमा सावधानी अपनाउन प्रशासनले आग्रह गरेको हो।

पदयात्राका क्रममा पर्यटकहरुमा ‘लेक लाग्ने’ समस्या देखिएकाे साथै मृत्यु र आपतकालीन उद्धारका घटनाहरू बढेका भन्दै प्रशासनले यात्रु तथा पर्यटन व्यवसायीहरूलाई थप सतर्कता अपनाउन अनुरोध गरेको छ।

प्रशासन कार्यालयले जारी गरेको विज्ञप्तिमा भनिएकाे छ, ‘ मौसम विज्ञान विभागबाट जारी हुने आधिकारिक सूचनाको पालना गरी मात्र यात्रा गर्ने।अन्नपूर्ण बेसक्याम्प, मर्दी हिमाल, खुमै डाँडा, कोरी लगायत हिमाली पदयात्रा मार्गहरूमा मौसम सफा नभएसम्म यात्रा नगर्ने। पर्याप्त तयारी, सूचना र अग्रिम बुकिङसहित मात्र पदयात्रामा जाने। समूहमा यात्रा गर्ने र विस्तारै उचाइ लिंदै जाने । न्यानो कपडा, तातोपानी, औषधि लगायत आवश्यक सामग्री बोक्ने। धुम्रपान र मद्यपान नगर्ने, तातोपानी र झोलिलो खाना खाने। ‘लेक लाग्ने’ लक्षण देखिएमा तुरुन्त तल्लो उचाइतर्फ झर्ने। स्थानीय तह, पर्यटन व्यवसायी, होटल तथा ट्रेकिङ एजेन्सीहरूले पूर्वतयारी र सहयोगी भूमिका निर्वाह गर्ने।’

आपतकालीन अवस्थामा सम्पर्क गर्न सकिने नम्बरहरु :

नेपाली सेना ०६१–५८११६०, ९७६३२४६०२२

नेपाल प्रहरी १०० (कन्ट्रोल), ९८५६०३९५९९

सशस्त्र प्रहरी बल ०६१–५४४०८८, ९८५१२७२०८०