म्याग्दी, मङ्सिर-१६, म्याग्दीको धवलागिरी गाउँपालिकाले दुर्गम बस्तीसम्म पुगेर वडामै योजना सम्झौता गर्ने व्यवस्था सुरू गरेपछि उपभोक्ता समितिका पदाधिकारी तथा सदस्यहरूलाई ठूलो सहजता पुगेको छ । समय, यात्रा र खर्च दुबै बचत हुने भएपछि स्थानीयवासीले यस कदमलाई स्वागत गरेका छन्।
गाउँपालिकाका जनप्रतिनिधि र कर्मचारीहरूको टोलीले घुम्ती शिविरमार्फत वडा कार्यालयमै पुगेर योजना सम्झौता गर्दै आएको छ। यही क्रममा धवलागिरी गाउँपालिका–४, मुदीमा सोमबार आयोजित शिविरमा १३ उपभोक्ता समितिसँग योजना सम्झौता सम्पन्न भएको छ।
गाउँपालिकाका अध्यक्ष प्रेमप्रसाद पुनका अनुसार दुर्गम बस्तीका नागरिकले ‘सिंहदरबार गाउँमै आएको’ अनुभूति पाउन सकून् भनेर वडामा पुगेर सम्झौता प्रक्रिया अघि बढाइएको हो। वडाबाट कागजातमा त्रुटि वा अपुग कागजातका कारण उपभोक्ता समिति बारम्बार गाउपालिकासम्म झुल्किनुपर्ने समस्यालाई अन्त्य गर्न घुम्ती शिविर प्रभावकारी बनेको अध्यक्ष पुनले बताउनुभयो।
योजना सम्झौताको पूर्वतयारीका लागि प्राविधिक टोलीले सर्वेक्षण, लागत अनुमान तथा नक्सा तयार पारी उपभोक्ता समिति गठन गरेपछि वडामै सम्झौता हुने व्यवस्था मिलाइएको वडा अध्यक्ष यामबहादुर घर्तीले जानकारी दिनुभयो। मुदीका १६ योजनामध्ये १३ वटा योजनामा सम्झौता भइसकेको छ।
यसका लागि प्रमुख प्रशासकीय अधिकृत, योजना अधिकृत, प्रशासन र प्राविधिक शाखाका प्रमुखसहितको टोली वडामा पुगेको थियो। चालु आर्थिक वर्षका योजनामा मंसिरभित्र सम्झौता सम्पन्न गरी चैतभित्र अन्तिम किस्ता भुक्तानी गर्ने लक्ष्य रहेको प्रमुख प्रशासकीय अधिकृत विष्णुप्रसाद शर्माले बताउनुभयो।
मुदीसँगै ताकम, मराङ र मल्कवाङमा पनि वडा–स्तरमै यस्तै घुम्ती शिविर सञ्चालन गरिने छ। रु. १० लाखभन्दा माथिका योजना ठेक्का र सोभन्दा कमका योजना उपभोक्ता समिति मार्फत कार्यान्वयन गरिने जनाइएको छ।
धवलागिरी गाउँपालिकाले चालु आर्थिक वर्षमा करिब १५० वटा योजना चयन गरेको छ। सातै वडामा खटिएका प्राविधिकहरूले सर्वेक्षण र डिजाइन तयार पारेपछि जनप्रतिनिधिहरूले उपभोक्ता समिति गठन गरी सम्झौताको तयारी मिलाइरहेका छन्।
वडामै सम्झौता हुने भएपछि समय, श्रम र खर्च दुबै बचत भएको धवलागिरी–४, बगर–जेल्तुङ खानेपानी मर्मत योजनाका उपभोक्ता समितिका अध्यक्ष यमप्रसाद घर्तीले बताउनुभयो।
