बेनी, मङ्सिर-२०, म्याग्दी सदरमुकाम बेनीस्थित बेनी खानेपानी तथा सरसफाइ उपभोक्ता संस्थाको २६औँ वार्षिक साधारणसभा शनिबार सम्पन्न भएको छ। साधारण सभासँगै संस्थाले विभिन्न व्यक्ति, संस्था तथा उत्कृष्ट कर्मचारीलाई सम्मान गरेको छ भने गलेश्वरधाम ज्येष्ठ नागरिक आश्रमलाई रु. ३० हजार १०० आर्थिक सहयोग प्रदान गरिएको छ। सहयोग राशी आश्रमका अध्यक्ष बमबहादुर पुनलाई हस्तान्तरण गरिएको हो।
साधारणसभामा पूर्व अध्यक्षहरू रेशम बानियाँ, माधवप्रसाद रेग्मी, हरिकृष्ण श्रेष्ठ, सुवासकुमार श्रेष्ठ, कार्यालयका उत्कृष्ट कर्मचारी प्रबन्धक यामबहादुर विक, उपभोक्ता यामबहादुर बानियाँ, साथै संस्थालाई सहयोग गर्ने बराहपाखो सामुदायिक वन उपभोक्ता समिति, जिल्ला प्रशासन कार्यालय, जिल्ला प्रहरी कार्यालय, बेनी नगरपालिका लगायतका संस्थालाई दोसल्ला र प्रशंसापत्रसहित सम्मान गरिएको हो।
उत्कृष्ट कर्मचारी प्रबन्धक यामबहादुर विकलाई रु. ७,५०० नगद, दोसल्ला र प्रशंसापत्र प्रदान गरिएको थियो। पुरस्कार तथा सम्मानपत्र प्रमुख जिल्ला अधिकारी बद्रीप्रसाद तिवारी, संस्थाका अध्यक्ष रमेश गिरी लगायतका अतिथिहरूले वितरण गर्नुभयो।
बेनी नगरपालिका वडा नं. ७, ८ र २ हाँडेभीर क्षेत्रमा बसोबास गर्ने करिब २२ हजार जनसङ्ख्या गुणस्तरीय खानेपानीको पहुँचमा रहेका छन्। आर्थिक वर्ष २०८१/०८२ मा निजी, सरकारी तथा संस्थागत गरी १,३०० घरधुरीले ४३ करोड १४ लाख ४४ हजार लिटर पानी प्रयोग गरेका छन्।
सोही अवधिमा संस्थाले खानेपानी बिक्रीबाट रु. १ करोड ९५ लाख ४४ हजार ६९६ आम्दानी गरेको छ भने रु. १ करोड ५८ लाख ६१ हजार ४४७ खर्च भएको कोषाध्यक्ष टंकप्रसाद हमालले जानकारी दिनुभयो। यसै आर्थिक वर्षमा नगर विकास कोषलाई पहिलो चरण र पुनर्निर्माण आयोजनाबाट रु. १९ लाख ५६ हजार ९०० भुक्तानी गरिएको छ भने रु. ४९ लाख ७४ हजार भुक्तानी बाँकी रहेको जानकारी दिइएको छ। संस्था हाल रु. २ करोड ९८ लाख ६६ हजार ३०० बैङ्क तथा नगद मौज्दात रहेको छ।
उद्घाटन क्रममा प्रजिअ तिवारीले शुद्ध खानेपानी वितरणमा प्रशासन सदैव सहयोगी रहने प्रतिबद्धता व्यक्त गर्दै मूहान संरक्षण र खानेपानी आयोजनाको स्तरोन्नति अपरिहार्य रहेको बताउनुभयो। कार्यक्रममा पूर्व अध्यक्ष माधवप्रसाद रेग्मी, राष्ट्रिय साना शहरी खानेपानी महासङ्घका कोषाध्यक्ष रक्षा भट्टराई, गण्डकी प्रदेश अध्यक्ष बिमला पहारी, लेखनाथ खानेपानी संस्थाका अध्यक्ष मुरारी शर्मा, जनप्रतिनिधि तथा सरोकारवाला व्यक्तिहरूले संस्थाको प्रयासको प्रशंसा गर्नुभयो।
संस्थाका अध्यक्ष रमेश गिरीका अनुसार प्रति सेकेन्ड ३० लिटर पानी भण्डारण क्षमता रहेको सेडिमेन्टेशन ट्यांकी, स्लो स्यान्ड फिल्टरलगायतका पूर्वाधार निर्माण भई सेवा विस्तार भइरहेको छ। अन्नपूर्ण गाउँपालिका–८ का पुम्दीखोला, रिठ्ठाखर्क, डाँडाखर्क, दुधे र कोप्रे खोलाबाट नियमित रूपमा खानेपानी आपूर्ति भइरहेको छ।
कार्यक्रम उपाध्यक्ष राजेन्द्रकुमार श्रेष्ठको स्वागत मन्तव्यमा सुरु भएको थियो भने सचिव केशवप्रसाद रेग्मीले सञ्चालन गर्नुभएको कार्यक्रममा कोषाध्यक्ष हमालले आर्थिक प्रतिवेदन तथा सचिव रेग्मीले प्रगति प्रतिवेदन प्रस्तुत गर्नुभएको थियो।
