बेनी, मङ्सिर-१३, म्याग्दीको बेनीमा सम्पन्न एभरेष्ट ग्लोबल एजुकेशन भिसाद्वारा प्रायोजित २३ औँ अन्तरमावि जेसीज कप फुटबल प्रतियोगितामा केबी एकेडेमी दरबाङ पहिलोपटक च्याम्पियन बनेको छ।
शनिबार सदरमुकाम खुल्लामञ्चमा भएको फाइनल खेलमा केबी एकेडेमीले बेनी सामुदायिक माविलाई ३–१ ले पराजित गर्दै उपाधि उचालेको हो। खेलको २२ मिनेटमै विवेक बुढाले अग्रता दिलाएपछि केबी एकेडेमी खेलभरि हाबी रह्यो। ३८ र ४३ मिनेटमा दिक्षित बुढाले थप दुई गोल गर्दै जित सुनिश्चित गरेका थिए।
प्रतियोगिताको अतिरिक्त समयमा बेनी सामुदायिकका सन्दिप क्षेत्रीले एक गोल गरे पनि नतिजा बदल्न सकेनन्।
यसअघि २०१८ को १७औँ संस्करणमा उपविजेता बनेको केबी एकेडेमीले लामो प्रतीक्षापछि उपाधि जितेको हो। लगातार दोस्रो वर्ष उपविजेता बनेको बेनी सामुदायिकको पहिलोपटक च्याम्पियन बन्ने सपना पुनः अधुरै रह्यो।
प्रतियोगितामा सर्वाधिक गोलकर्ता खिमबहादुर थापा (केबी), एञ्जल थजाली (माउण्ट एभरेष्ट) र एलिन जुग्जाली (लिटल गार्डेन) बने। उत्कृष्ट खेलाडी होमन जुग्जाली, उत्कृष्ट गोलरक्षक सञ्जन घर्ती, उत्कृष्ट डिफेन्डर साइरेस पुनलगायत विभिन्न विधामा खेलाडीहरू सम्मानित भए।
बिजेता र उपबिजेता टिमलाई गण्डकी प्रदेशसभा सदस्यदेखि जेसीज पदाधिकारी र मुख्य प्रायोजक एभरेष्ट ग्लोबल एजुकेशन भिसा सर्भिसेसका प्रतिनिधिले ट्रफि, मेडल, प्रमाणपत्र तथा ५५ हजार ५५५ र ३५ हजार ५३५ रुपैयाँका पुरस्कार वितरण गरेका थिए।
एभरेष्ट ग्लोबल एजुकेशन भिसा सर्भिसेसले प्रतियोगितालाई सन् २०२८ सम्म मुख्य प्रायोजन गर्ने भएको छ। म्याग्दीमा प्रतिभावान फुटबलर उत्पादनका लागि जेसीज कप महत्वपूर्ण गेटकिपर प्रतियोगिता मानिन्छ।
