बेनी, भदौ-११ म्याग्दीको बेनी नगरपालिका–६ चुत्रेनीमा हरितालिका तीज पर्वको अवसरमा मंगलबारदेखि नवौं मुनसन कप फुटबल प्रतियोगिता सुरु भएको छ।
द मुनसन युवा क्लबको आयोजनामा पाँच दिनसम्म सञ्चालन हुने प्रतियोगितामा खुल्ला पुरुष, पौद्ध र महिला फुटबल खेल समावेश गरिएको छ। पहिलो दिन सम्पन्न महिला फुटसलमा आयोजक मुनसन क्लब र म्याग्दी वर्कसप फाइनलमा प्रवेश गरेका छन्।
छ समूह सहभागी महिला खेलमा विजेताले २२ हजार २२२ रुपैयाँ र उपविजेताले ११ हजार १११ रुपैयाँ नगदसहित पुरस्कार पाउनेछन्।
त्यसैगरी, खुल्ला पुरुष फुटबलतर्फ १३ समूहले प्रतिस्पर्धा गर्दैछन्। विजेताले एक लाख रुपैयाँसहित ट्रफी, मेडल र प्रमाणपत्र पाउनेछन् भने उपविजेताले ५० हजार रुपैयाँ प्राप्त गर्नेछन्। साथै अनुशासित टिमलाई १० हजार, उत्कृष्ट खेलाडी, किपर, डिफेन्डर, मिडफिल्डर, सुटर, सर्वाधिक गोलकर्ता र उदयीमान खेलाडीलाई जनही दुई–दुई हजार नगद पुरस्कारको व्यवस्था गरिएको छ।
प्रतियोगिताको उद्घाटन बेनी नगरपालिका–६ का वडाध्यक्ष कृष्णसिंह बानियाले गर्नुभयो। उहाँले चुत्रेनी खेलमैदानलाई व्यवस्थित बनाउन चार करोडको डीपीआर तयार गरी स्रोतको खोजी भइरहेको र हालसम्म ४० लाख रुपैयाँ लगानी भइसकेको जानकारी दिनुभयो।
उद्घाटन कार्यक्रममा जिल्ला फुटबल संघ म्याग्दीका अध्यक्ष कुमार बानियाले शुभकामना मन्तव्य व्यक्त गर्नुभएको थियो भने सञ्चालन शिक्षिका सिसम परियारले गर्नुभएको थियो।
