बेनी, साउन-२२, जिल्ला खेलकुद विकास समिति म्याग्दीले विभिन्न प्रदेशस्तरीय प्रतियोगितामा पदक जित्ने खेलाडी तथा प्रशिक्षकलाई बुधबार एक कार्यक्रमका बीच सम्मान गरेको छ।
बेनीस्थित खेलकुद विकास समितिको सभाहलमा आयोजित कार्यक्रममा नेपाल सरकारका ऊर्जा, जलस्रोत तथा सिँचाइ राज्यमन्त्री खम्बबहादुर गर्बुजाले गण्डकी प्रदेशस्तरीय प्रतियोगितामा स्वर्ण, रजत र कास्य पदक विजेता खेलाडीलाई नगदसहित सम्मान गर्नुभयो।
मार्शल आर्ट, भलिबल र ब्याडमिन्टन खेलमा पदक जित्ने खेलाडीलाई क्रमशः ३ हजार, २ हजार र १ हजार रुपैयाँ नगद पुरस्कार तथा सम्मानपत्र प्रदान गरिएको थियो।
कार्यक्रममा जम्मा ७७ जनालाई सम्मान गरिएको थियो, जसमा १३ जना अफिसियल र ६४ जना खेलाडी रहेका छन्।
गोरखामा सम्पन्न १६औँ गण्डकी प्रदेशस्तरीय राष्ट्रपति रनिङ शिल्डमा म्याग्दीले ११ स्वर्ण, ७ रजत र ९ कास्य पदकसहित दोस्रो स्थान हासिल गरेको थियो।
कार्यक्रममा प्रमुख अतिथि राज्यमन्त्री गर्बुजाले खेलकुद र राजनीतिमा हारजित सामान्य भएको बताउँदै लक्ष्य प्राप्तिका लागि निरन्तर प्रयत्न गर्नुपर्नेमा जोड दिनुभयो। उहाँले भन्नुभयो— “खेलाडीले हारबाटै जितको सपना देख्नुपर्छ, खेलक्षेत्रमा लागेकालाई घाटा हुँदैन।”
सोही अवसरमा राष्ट्रिय महिला भलिबल टिमकी कप्तान अरुणा शाहीलाई नगद १५ हजार र दोसल्ला प्रदान गरी सम्मान गरिएको थियो। त्यस्तै, गण्डकी प्रदेश महिला भलिबल टिमकी काजोल छन्त्याललाई ५ हजार रुपैयाँ नगद र सम्मानपत्र प्रदान गरिएको थियो।
कार्यक्रममा जिल्ला भलिबल संघका अध्यक्ष तेजेन्द्र बानियाँ, नेपाल पत्रकार महासंघ म्याग्दीका अध्यक्ष हरिकृष्ण गौतमलगायतले मन्तव्य व्यक्त गर्नुभएको थियो।
सम्मान कार्यक्रममा प्रमुख जिल्ला अधिकारी गुरुदत्त ढकाल, प्रहरी नायब उपरीक्षक सूर्य थापा, राष्ट्रिय अनुसन्धान कार्यालय म्याग्दीका प्रमुख विजय पौडेल, शसस्त्र प्रहरी बल गलेश्वरका प्रहरी नायब उपरीक्षक लीलाबहादुर भुजेल, विभिन्न संघसंस्थाका प्रतिनिधि र खेलाडीहरुको उपस्थिति रहेको थियो।
कार्यक्रम जिल्ला खेलकुद विकास समितिका अध्यक्ष सुमन श्रेष्ठको अध्यक्षता, उपाध्यक्ष विष्णु रोकाको स्वागत र सचिव कुमार किसानको सञ्चालनमा सम्पन्न भएको थियो।
