बेनी, भदौ-२०, म्याग्दीमा २३ औं अन्तरमावि जेसीज कप फुटबल प्रतियोगिता आगामी मङ्सिर ८ गतेदेखि १३ गतेसम्म हुने भएको छ । म्याग्दी जेसीजको मुख्य आयोजनामा सदरमुकाम बेनीको खुला मञ्चमा हुने प्रतियोगिताबारे शुक्रबार बिहान पत्रकार सम्मेलनमार्फत जानकारी दिइएको हो ।
जेसीजका कोषाध्यक्ष नविन पौडेलको मूल संयोजकत्वमा करिब २० वटा उपसमिति गठन गरी तयारी भइरहेको आयोजक शाखा अध्यक्ष विनादे घर्ती क्षत्रीले जानकारी दिनुभयो । उहाँका अनुसार यसपटक प्रतियोगितालाई विगतभन्दा अझ भव्य बनाउन पुरस्कार राशी समेत बढाइएको छ ।
प्रतियोगिताको टाईटल प्रायोजकमा एभरेष्ट ग्लोबल एजुकेशन भिसा सर्भिसेस रहनेछ । यस अन्तर्गत विजेता विद्यालयले रनिङ शिल्ड, ट्रफि, मेडल र प्रमाणपत्रसहित नगद ५५ हजार ५५५ रुपैयाँ पाउनेछन् । त्यस्तै, उपविजेताले ट्रफि, मेडल, प्रमाणपत्रसहित ३५ हजार ५३५ रुपैयाँ प्राप्त गर्नेछन् ।
साथै उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक, डिफेन्डर, स्ट्राइकर, मिडफिल्डर, राइजिङ प्लेयर, उत्कृष्ट कोच र अनुशासित टिमलाई जनही २ हजार ५ सय रुपैयाँसहित ट्रफि प्रदान गरिनेछ । सेमिफाइनलमा पुग्ने टिमलाई ५/५ हजार र प्रत्येक खेलमा ‘म्यान अफ द म्याच’ पुरस्कार पनि घोषणा गरिएको छ ।
आयोजकले प्रतियोगिताबाट करिब ७ लाख ८० हजार आम्दानी र ७ लाख ५७ हजार २३१ खर्च हुने अनुमान गरेको छ । पत्रकार सम्मेलनमा राष्ट्रिय जेसीजका उपाध्यक्ष सन्दिप खत्री, पूर्वअध्यक्ष बिनय श्रेष्ठ, खम थापा, अध्यक्ष सुमन बानियाँ, विरेन्द्र श्रेष्ठ, निवर्तमान अध्यक्ष दिनेश बानियाँलगायतको उपस्थिती रहेको थियो ।
प्रतियोगितामा म्याग्दीका करिब २३ भन्दा बढी विद्यालय टिम सहभागी हुने अनुमान गरिएको छ । स्मरणीय छ, गत वर्ष सम्पन्न २२ औं संस्करणमा माउण्ट एभरेष्ट आवासीय माध्यमिक विद्यालय विजयी बनेको थियो ।
