म्याग्दी, भदौ-१, न्यु वेष्ट पोइन्ट आवासीय माविमा कक्षा १२ ले कक्षा ११ का विद्यार्थीहरूसँगको आत्मीयता र भातृत्व विकास गर्ने उद्देश्यले आयोजना गरेको ६–ए साइड छात्र फुटबल प्रतियोगिता सम्पन्न भएको छ। प्रतियोगिता वार्षिक कार्यतालिकाअनुसार आयोजना गरिएको हो र यस वर्ष पनि विगतका वर्षझैँ अत्यन्त उत्साहपूर्ण तरिकाले सम्पन्न भएको छ।
प्रतियोगिता साउन २८ देखि सुरु भई साउन ३० गते शुक्रबार सम्पन्न भएको थियो। प्रतियोगितामा कक्षा ९ देखि १२ सम्मका विभिन्न समूहहरूले सक्रिय सहभागिता जनाएका थिए। प्रतियोगिताको विजेता र उपविजेतालाई भदौ १ गते आइतबार विद्यालयको प्रार्थना सभामा पुरस्कार वितरण गरिएको थियो।
प्रतियोगितामा कक्षा ११ को फाइनान्स समूह विजेता बन्न सफल भएको थियो भने कक्षा ९ को समूह उपविजेता घोषित गरिएको थियो। विजेतालाई नगद रु १०,०००, ट्रफी, मेडल र प्रमाण पत्र प्रदान गरिएको थियो भने उपविजेतालाई नगद रु ५,०००, ट्रफी, मेडल र प्रमाण पत्र प्रदान गरिएको थियो। पुरस्कार वितरण कार्यक्रममा विद्यालयका प्रिन्सिपल डिबी दाहाल र खेलकुद कार्यक्रम संयोजक कक्षा १२ का समान थापा उपस्थित थिए।
प्रतियोगितामा व्यक्तिगत स्तरमा पनि उत्कृष्ट प्रदर्शन गर्ने विद्यार्थीहरूको सम्मान गरिएको थियो। यसअनुसार सर्बाधिक गोलकर्ता कक्षा १० का सञ्जोक थापा, उत्कृष्ट गोलरक्षक सिद्धार्थ पाइजा, र उत्कृष्ट खेलाडी आयुष मगर घोषित भएका थिए। त्यसैगरी प्रत्येक खेलमा म्यान अफ द म्याच को ट्रफी पनि प्रदान गरिएको थियो।
विद्यालयका प्रिन्सिपल दिबी दाहाल ले कार्यक्रममा आफ्नो मन्तव्य व्यक्त गर्दै भने, “विद्यालयमा मात्र पाठ्यक्रमका विषयमा मात्र नभई, यस्ता गतिविधिहरूले विद्यार्थीहरूको भातृत्व, आत्मीयता र सहकार्य विकासमा महत्वपूर्ण भूमिका खेल्छ। विद्यार्थीहरूले उत्कृष्ट व्यवस्थापनका साथ कार्यक्रम सम्पन्न गरेका छन्, जसको लागि सबैलाई बधाई छ।”
प्रतियोगिता न्यु वेष्ट पोइन्ट आवासीय माविका विद्यार्थीहरूको खेलकुद र सहपाठी सम्बन्ध प्रगाढ बनाउन योगदान पुर्याउने कार्यक्रमको रूपमा सफल रहेको वेष्ट पोइन्ट +२ ले जनाएको छ ।
