बेनी, साउन-२९, म्याग्दीको रघुगंगा गाउँपालिका–३, पिप्लेमी जन्मिएकी राष्ट्रिय महिला भलिबल टोलीकी कप्तान अरुणा शाहीको सम्मानार्थ गृहजिल्लामा स्तम्भ निर्माण गरिने भएको छ । जिल्ला खेलकुद विकास समितिले बेनी नगरपालिका–८, कालिपुल क्षेत्रमा समिति स्वामित्वको जग्गा वा अन्य उपयुक्त स्थानमा उद्यानसहितको स्तम्भ निर्माण गर्ने तयारी गरेको हो ।
समितिका अध्यक्ष सुमन श्रेष्ठका अनुसार शाहीले भलिबल खेलमार्फत नेपालको पहिचान अन्तर्राष्ट्रिय स्तरमा स्थापित गर्न महत्वपूर्ण योगदान पुर्याएकी छन् । उनले जारी गरेको प्रेस विज्ञप्तिमा “उहाँ राष्ट्रको गहना हो” भन्दै शाहीको योगदान अतुलनीय रहेको उल्लेख गरिएको छ ।
सन् २०१३ मा माल्दिभ्सविरुद्धको मैत्रीपूर्ण खेलबाट राष्ट्रिय टिममा डेब्यु गरेकी शाहीको कप्तानीमा नेपालले एभीसी सिनियर वुमन्स सेन्ट्रल जोनमा दुई उपाधि, दक्षिण एसियाली खेलकुदमा ऐतिहासिक रजत, काभा वुमन्स भलिबल नेसन्स लिगमा रजत, च्यालेन्ज कपमा कांस्य पदक जितेको छ । साथै, नेपालले इतिहासमै पहिलो पटक भारतलाई पराजित गर्ने उपलब्धि पनि उनको नेतृत्वमै हासिल गरेको हो ।
डेढ दशकदेखि भलिबल खेल्दै आएकी शाहीले सजेएफ पल्सर स्पोर्ट्स अवार्डसहित विभिन्न प्रतिष्ठित अवार्ड प्राप्त गरेकी छन् ।
