काठमाडौँ, असोज-१, गरिमा विकास बैंक लिमिटेडले आफ्ना ग्राहकका लागि भर्चुअल क्रेडिट कार्ड सेवा सुरु गरेको छ।
बैंकले फोनपे नेटवर्कसँगको सहकार्यमा आफ्नो मोबाइल बैंकिङ एप ‘गरिमा डीजी बटुवा’ मार्फत यो सेवा सञ्चालनमा ल्याएको हो। बैंकका अनुसार, ग्राहकले नजिकको शाखा कार्यालयमा गएर फारम भरेपछि सो सेवा आफ्नो मोबाइल एपमा सुचारु गर्न सक्नेछन्।
यो भर्चुअल क्रेडिट कार्ड प्रयोग गरी ग्राहकले फोनपेको कुनै पनि क्युआर कोड वा नेटवर्कमा सहजै भुक्तानी गर्न सक्नेछन्। न्यूनतम १० हजारदेखि अधिकतम एक लाख रुपैयाँसम्मको क्रेडिट सीमा रहेको यस कार्डमा ४५ दिनसम्म ब्याज नलाग्ने सुविधा उपलब्ध गराइएको छ।
साथै, हिसाब राफसाफ गर्दा १० प्रतिशत मात्र वा शतप्रतिशत भुक्तानी गर्ने विकल्प पनि रहने बैंकले जनाएको छ।
भौतिक कार्डको सट्टा मोबाइल एपमै उपलब्ध हुने यो भर्चुअल कार्डले ग्राहकलाई थप सुरक्षित र आधुनिक भुक्तानी अनुभव दिने विश्वास बैंकले व्यक्त गरेको छ।
