विश्व प्रेस स्वतन्त्रता दिवसको अवसरमा म्याग्दीका २१ पत्रकारलाई १० लाख रुपैयाँ बराबरको दुर्घटना बीमा हस्तान्तरण

देवी जिसी /बेनी, बैशाख-२०, नेपाल पत्रकार महासंघ म्याग्दी शाखाले जिल्लामा क्रियाशील पत्रकारहरूको पेशागत सुरक्षालाई प्राथमिकता दिँदै दश लाख रुपैयाँ बराबरको सामूहिक दुर्घटना बीमा योजना हस्तान्तरण गरेको छ।

विश्व प्रेस स्वतन्त्रता दिवस २०८२ को अवसरमा शनिबार (बैशाख २० गते) पत्रकार महासंघ म्याग्दी शाखाको आयोजनामा आयोजित विशेष कार्यक्रममा जिल्लाका २१ जना क्रियाशील पत्रकारहरूलाई बीमा सुविधा प्रदान गरिएको हो। कार्यक्रममा पत्रकार महासंघ गण्डकी प्रदेशका उपाध्यक्ष प्रकाश पौडेल, म्याग्दी शाखाका अध्यक्ष हरिकृष्ण गौतम र संस्थापक अध्यक्ष धनश्याम खड्काले बीमा पत्रहरू हस्तान्तरण गर्नुभएको थियो।

शिखर इन्स्योरेन्ससँगको सम्झौता अन्तर्गत सञ्चालित उक्त बीमा योजनाअनुसार कार्यक्षेत्रमा खटिँदा वा अन्य पेशागत गतिविधिका क्रममा पत्रकारहरू दुर्घटनामा परेमा मृत्य वा पूर्ण अशक्तताको अवस्थामा अधिकतम दश लाख रुपैयाँ र सामान्य चोटपटकको अवस्थामा उपचार खर्चस्वरूप अधिकतम एक लाख रुपैयाँसम्मको बीमा सुविधा प्राप्त गर्न सक्ने व्यवस्था गरिएको छ।

कार्यक्रमका प्रमुख अतिथि तथा नेपाल पत्रकार महासंघ गण्डकी प्रदेशका उपाध्यक्ष पौडेलले पत्रकारको पेशागत सुरक्षाका लागि नयाँ कार्यसमितिले अघि सारेका गतिविधिहरू सराहनीय भएको उल्लेख गर्नुभयो। उहाँले भन्नुभयो, “हामी चाहन्छौं कसैलाई पनि दुर्घटना नहोस्। तर आकस्मिक परिस्थितिमा राहत दिनका लागि यस्तो बीमा योजना अत्यन्त उपयोगी र दूरदर्शी कदम हो।”

कार्यक्रमकै अवसरमा म्याग्दीकाली एफएममा कार्यरत पत्रकार दीपा बुढाथोकीकी आमाको मृगौलासम्बन्धी उपचारका लागि पत्रकार महासंघको आपतकालीन कोषबाट रु ३२,५०० (बत्तीस हजार पाँच सय) रुपैयाँ आर्थिक सहायता प्रदान गरिएको थियो।

शाखा अध्यक्ष हरिकृष्ण गौतमको अध्यक्षतामा सम्पन्न उक्त कार्यक्रममा उपाध्यक्ष दलप्रसाद विश्वकर्माले स्वागत मन्तव्य राख्नुभएको थियो भने सञ्चालन महासंघका सचिव ठाकुरप्रसाद आचार्यले गर्नुभएको थियो।

२०७९ मंसिर २८ गते सम्पन्न निर्वाचनमार्फत गठन भएको नयाँ कार्यसमितिले पदबहालीपछिका केही महिनामै पत्रकारहरूको क्षमता विकास, सशक्तिकरण र हकहितको संरक्षणका निम्ति उल्लेखनीय कार्यक्रमहरू सञ्चालन गरेको छ। यस अन्तर्गत पत्रकारिता पाठशालामार्फत नयाँ पत्रकार उत्पादन तथा तालिम कार्यक्रम, सूचना तथा प्रसार विभागमार्फत प्रेस कार्ड वितरणका लागि घुम्ती शिविर सञ्चालन, स्थापना दिवसको अवसरमा फुटसल प्रतियोगिता आयोजना, र हिमाली जिल्ला म्याग्दीका सञ्चारमाध्यमहरूको सुविधाको माग गर्दै विभिन्न निकायमा पहल गरिएको छ।

पत्रकार महासंघ म्याग्दी शाखाले आगामी दिनमा पनि पत्रकार र तिनका परिवारहरूको कठिनाइमा साथ दिँदै सामाजिक उत्तरदायित्व वहन गर्ने प्रतिबद्धता जनाएको छ।