बेनी असार-१२, समृद्ध अन्नपूर्ण निर्माणको आधारको रुपमा दीगो कृषि, पर्यटन, ऊर्जा र उत्थानशील पूर्वाधारलाई पहिचान दिँदै अन्नपूर्ण गाउँपालिकाले आगामी आर्थिक वर्ष २०८२/०८३ का लागि ६० करोड ७६ लाख रुपैयाँ बराबरको बजेट सार्वजनिक गरेको छ।
म्याग्दीको अन्नपूर्ण गाउँपालिका कार्यालयमा मंगलबार सम्पन्न गाउँसभाको २१औँ अधिवेशनबाट नीति, कार्यक्रम र बजेट सार्वजनिक गरिएको हो।
गाउँपालिकाका उपाध्यक्ष दिवाकुमारी तिलिजा पुनले आगामी वर्ष कार्यान्वयन हुने नीति तथा कार्यक्रमका लागि चालू खर्चतर्फ ३७ करोड ५३ लाख रुपैयाँ र पूँजीगत खर्चतर्फ २३ करोड २२ लाख रुपैयाँ बजेट विनियोजन गरिएको जानकारी दिनुभयो।
संघीय सरकारबाट प्राप्त वित्तीय समानीकरण, सशर्त, विशेष र समपूरक अनुदानहरू साथै प्रदेश सरकारबाट प्राप्त अनुदान, सवारी कर तथा आन्तरिक स्रोतसमेत गरी आयको मुख्य हिस्सा सुनिश्चित गरिएको छ।
सामाजिक विकासतर्फ सबैभन्दा बढी २७ करोड ६८ लाख रुपैयाँ अर्थात् कुल बजेटको करिब ४६ प्रतिशत रकम छुट्याइएको छ भने भौतिक पूर्वाधार विकासतर्फ २० करोड ९६ लाख रुपैयाँ विनियोजन गरिएको छ।
स्वास्थ्य, आयुर्वेद र योगका कार्यक्रमका लागि ५ करोड ४३ लाख, स्थानीय कला, भाषा र संस्कृतिको संरक्षणका लागि २४ लाख ५० हजार, खेलकुद कार्यक्रमका लागि १२ लाख तथा लैङ्गिक समानता र सामाजिक समावेशीकरणका लागि ५९ लाख ५० हजार रुपैयाँ विनियोजन गरिएको छ।
त्यसैगरी प्रशासकीय भवनका लागि १ करोड १२ लाख र विभिन्न वडामा सामुदायिक भवन निर्माणमा ११ करोड २९ लाख रुपैयाँ बजेट छुट्याइएको छ। आर्थिक विकासतर्फ पनि २ करोड २३ लाख रुपैयाँको व्यवस्था गरिएको छ।
यसअघि गाउँपालिकाका अध्यक्ष भारतकुमार पुनले वार्षिक नीति तथा कार्यक्रम प्रस्तुत गर्नुभएको थियो भने लेखा समितिका संयोजक पुष्पा बानियाँ बरुवालले लेखा प्रतिवेदन सार्वजनिक गर्नुभएको थियो।
गाउँसभाले प्रस्तुत सबै नीति, कार्यक्रम र बजेटलाई सर्वसम्मत पारित गरेको हो।
