जलजला, असार-१०, पर्वत जिल्लाको जलजला गाउँपालिकाले आगामी आर्थिक वर्ष २०८२–०८३ का लागि ५९ करोड ५४ लाख रुपैयाँको बजेटसहित नीति तथा कार्यक्रम सार्वजनिक गरेको छ।
मंगलबार लामाखेतस्थित गाउँपालिका केन्द्रको सभाहलमा सम्पन्न १९औँ गाउँसभा अधिवेशनमा उपाध्यक्ष दिपक आचार्यले आगामी वर्षको लागि विनियोजन गरिएको बजेट प्रस्तुत गर्नुभएको थियो। प्रस्तुत बजेट छलफलसहित पारित गरिएको हो।
यसै अधिवेशनमा अध्यक्ष राजुप्रसाद आचार्यद्वारा प्रस्तुत नीति तथा कार्यक्रम पनि पारित भएको छ। गाउँपालिका प्र
ख प्रशासकीय अधिकृत हरिकृष्ण आचार्यका अनुसार, अधिवेशनबाट विनियोजन ऐन–२०८२ र आर्थिक विधेयक–२०८२ पनि पारित गरिएको छ।
पारित बजेट अनुसार, चालु खर्चतर्फ ३६ करोड ५६ लाख २२ हजार र पुँजीगत खर्चतर्फ २२ करोड ९७ लाख ७८ हजार रुपैयाँ विनियोजन गरिएको छ।
राजस्व स्रोततर्फ संघीय र प्रदेश सरकारका समानीकरण, सशर्त, समपुरक, र विशेष अनुदान मिलाएर जम्मा ५७ करोड ७० लाख रुपैयाँ बराबरको बजेट जुटाइने जनाइएको छ। बाँकी ९ करोड ८३ लाख रुपैयाँ आन्तरिक आम्दानीबाट व्यवस्थापन गरिनेछ।
क्षेत्रगत कार्यक्रमतर्फ कार्यालय सञ्चालनका लागि १० करोड, शखागत कार्यक्रमका लागि १० करोड २७ लाख, वडागत ४ करोड ५० लाख, र दायित्व साझेदारी कार्यक्रमतर्फ ४ करोड २५ लाख रुपैयाँ विनियोजन गरिएको छ। साथै, सशर्त, समपुरक र विशेष अनुदान कार्यक्रमतर्फ ३० करोड ५२ लाख रुपैयाँ छुट्याइएको छ।
हालको आर्थिक वर्षको जेठ मसान्तसम्मको प्रगति विवरण अनुसार, चालुतर्फ ७२ दशमलव ६९ प्रतिशत र पुँजीगत तर्फ ५२ दशमलव ९९ प्रतिशत खर्च भई, औसत ६७ दशमलव ३७ प्रतिशत प्रगति भएको गाउँपालिकाले जनाएको छ।
गाउँपालिका अध्यक्ष आचार्यका अनुसार, शिक्षा, स्वास्थ्य, कृषि, पर्यटन, धार्मिक क्षेत्र, रोजगार, पूर्वाधार, उद्यम, खेलकुद, आयआर्जन तथा विपद् व्यवस्थापन जस्ता क्षेत्रमा प्राथमिकता दिँदै आगामी वर्षको कार्यक्रम तय गरिएको छ। गाउँसभा छलफलमा लोकबहादुर पुन, विकास भण्डारी, टकबहादुर पुर्जा लगायतका सदस्यहरुले आ–आफ्ना सुझाव तथा प्रतिक्रिया राख्नुभएको थियो।
