बेनी, असार-१०, म्याग्दी जिल्लाको मंगला गाउँपालिकाले सोमबार आगामी आर्थिक वर्ष २०८२/०८३ का लागि ४४ करोड ६१ लाख रुपैयाँभन्दा बढीको बजेट सार्वजनिक गरेको छ। गाउँपालिकाको केन्द्र बाबियाचौरमा सम्पन्न २०औं गाउँसभामा उपाध्यक्ष प्रेमकुमारी क्षत्रीले ४४ करोड ६१ लाख ५६ हजार चारसय ५१ रुपैयाँको बजेट प्रस्तुत गर्नुभएको हो।
प्रमुख प्रशासकीय अधिकृत गोपाल शर्माका अनुसार, प्रस्तुत बजेटमा चालु खर्चतर्फ ३१ करोड ३३ लाख २० हजार चारसय ५१ रुपैयाँ र पूँजीगततर्फ १३ करोड २७ लाख ३६ हजार रुपैयाँ विनियोजन गरिएको छ।
यो बजेटमार्फत शिक्षा, स्वास्थ्य, कृषि, पर्यटन र खेलकुदलगायत क्षेत्रको विकासलाई प्राथमिकता दिइएको छ। गाउँपालिकाका अध्यक्ष सतप्रसाद रोकाले प्रस्तुत गर्नुभएको वार्षिक नीति तथा कार्यक्रमअनुसार:
पहिलो, स्वास्थ्य बीमा कार्यक्रम सबै घरपरिवारमा लागू गरिनेछ। आर्थिक अवस्था कमजोर भएका परिवार र ‘ग’ वर्गको अपाङ्गता भएका व्यक्तिहरूका लागि निःशुल्क स्वास्थ्य बीमाको व्यवस्था मिलाइनेछ।
दोस्रो, मातृ स्वास्थ्य सुरक्षालाई प्रोत्साहन गर्न अनिवार्य रूपमा गर्भावस्था र प्रसुतिपश्चात् स्वास्थ्य चेकजाँच गर्ने र स्वास्थ्य संस्थामा सुत्केरी गराउने वातावरण मिलाइनेछ।
तेस्रो, ज्येष्ठ नागरिकहरूलाई उनीहरूकै घरमा पुगेर सामाजिक सुरक्षाभत्ता वितरण गर्न बैंक तथा वित्तीय संस्थासँगको सहकार्यमा भत्ता उपलब्ध गराइनेछ।
चौथो, असंगठित तथा अनौपचारिक क्षेत्रमा कार्यरत श्रमिकहरूलाई सूचीकृत गरी योगदानमा आधारित सामाजिक सुरक्षा कार्यक्रममा आबद्ध गराइनेछ।
यसैगरी, विद्यालय उमेर समूहका बालबालिकाहरूलाई ‘बालबालिकासँग अध्यक्ष’ कार्यक्रम अन्तर्गत दुध वितरणका लागि आवश्यक बजेट विनियोजन गरिएको छ।
२०औं गाउँसभामा प्रस्तुत आगामी आवको वार्षिक नीति, कार्यक्रम र बजेट सर्वसम्मत रूपमा पारित भएको छ। यसका साथै आयव्यय, मध्यमकालीन खर्च, आगामी आवको विनियोजन विधेयक, न्यायिक समितिको प्रतिवेदन र अनुगमन समितिको प्रतिवेदनलगायत प्रस्तावहरू पनि सर्वसम्मतिले पारित भएका छन्।
सोमबारै म्याग्दीको मालिका र धवलागिरि गाउँपालिकाले पनि आउँदो वर्षको नीति, कार्यक्रम र बजेट सार्वजनिक गरेका छन्। रघुगंगाले यसअघि बजेट ल्याइसकेको छ भने आज बेनी नगरपालिका र अन्नपूर्ण गाउँपालिकाले पनि बजेट ल्याउँदै छन्।
