म्याग्दी, भदौ-८, नेकपा एमाले निकट अखिल नेपाल महिला संघ (अनेमसंघ) गण्डकी प्रदेशको दोस्रो सम्मेलन भव्यरूपमा सम्पन्न भएको छ। गत भदौ ५ र ६ गते पोखरामा सम्पन्न उक्त सम्मेलनले म्याग्दीकी खर्माया बिटालुलाई सर्वसम्मत रूपमा अध्यक्ष पदमा चयन गरेको हो।
बिटालु विगत लामो समयदेखि महिला अधिकार, सामाजिक न्याय र संगठन सुदृढीकरणका क्षेत्रमा सक्रिय रहँदै आउनुभएको छ । मालिका गाउँपालिकाकी संस्थापक उपाध्यक्ष समेत रहनुभएकी बिटालुले यसअघि अनेमसंघ गण्डकी प्रदेश कार्यसमितिको सचिव पदमा निर्वाह गरिसक्नुभएको छ ।
यसपटकको नयाँ कार्यसमिति सर्वसम्मत रूपमा चयन भएको छ। उपाध्यक्षमा पद्मा गुरुङ, सचिवमा कमला मरासिनी, सहसचिवमा निर्मला वाग्ले, सचिवमा रमा त्रिपाठी र कोषाध्यक्षमा कृष्णमाया गुरुङ चयन भएका छन्। त्यस्तै सदस्यमा समेत विभिन्न जिल्लाबाट प्रतिनिधित्व हुने गरी महिला नेतृहरूको टोली चयन भएको छ।
अध्यक्षमा निर्वाचित खर्माया बिटालुले आफूलाई दिएको विश्वासप्रति आभार व्यक्त गर्दै गण्डकी प्रदेशमा महिला अधिकार, समानता र नेतृत्व विकासका लागि अझ सक्रिय भएर काम गर्ने प्रतिबद्धता जनाउनुभयो । उहाँले संगठनलाई थप सबल, सक्षम र पार्टीलाई अझ बलियो बनाउन आफू निरन्तर क्रियाशील रहने प्रतिज्ञा समेत गर्नुभयो ।
सम्मेलनमा गण्डकी प्रदेशका विभिन्न जिल्लाबाट आएका प्रतिनिधिहरू, नेताहरू र कार्यकर्ताहरूको उल्लेख्य सहभागिता थियो। सहभागीहरूले अनेमसंघ गण्डकीको नेतृत्वमा नयाँ पुस्ताले ल्याउने अपेक्षित परिवर्तन र संगठनात्मक बलबृद्धि हुने विश्वास व्यक्त गरेका थिए।
