बेनी, साउन-३१, म्याग्दीको बेनी नगरपालिका–८ कालिपुलस्थित बालमन्दिर माध्यमिक विद्यालयमा विशेष कार्यक्रम सम्पन्न भएको छ । विद्यालयले वार्षिक कार्यतालिकाअनुसार आयोजना गरेको दुई दिने छलफल, अन्तरक्रिया तथा प्रशिक्षण कार्यक्रममा “विद्यालय शिक्षामा विद्यार्थी तथा अभिभावकको भूमिका” विषयमा अभिभावक, शिक्षक र विद्यार्थीबीच गहन बहस भएको हो ।
दोस्रो दिन अभिभावकहरुको उल्लेखनीय सहभागिताले विद्यालय–अभिभावक साझेदारीको आवश्यकता अझ प्रष्ट भएको विद्यालयले जनाएको छ । दुवै दिनको कार्यक्रमको सहजीकरण उत्प्रेरक कृष्ण जिसीले गर्नुभएको थियो । अभिभावकहरुको उल्लेखनीय सहभागिताले विद्यालय–अभिभावक साझेदारीको आवश्यकता र महत्त्वलाई अझ स्पष्ट पारेको विद्यालयले जनाएको छ । छलफल तथा अन्तरक्रियाका क्रममा विद्यार्थीको शैक्षिक प्रगति, अनुशासन, अभिभावकको जिम्मेवारी, घर–विद्यालयको सम्बन्ध सुदृढीकरण र बालमैत्री शिक्षा वातावरण निर्माणका विषयमा विशेष बहस भएको थियो ।
यसै अवसरमा विद्यालयमा शिक्षक अभिभावक संघ पुनर्गठन समेत सम्पन्न भएको छ । पुनर्गठनपछि रमा किसान अध्यक्ष चयन हुनु भएको छ भने सरिता किसान, लक्ष्मी घिमिरे, कुमारी बिक, मनकुमारी सुनार, यामकुमारी अर्मजा, मन्जु बिक र सरस्वती बिक सदस्यमा चयन हुनुभएको छ ।
विद्यालय परिवारले नवनिर्वाचित पदाधिकारीहरुलाई बधाई दिँदै विद्यालयको शैक्षिक गुणस्तर बिकास र अभिभावक–शिक्षक समन्वयलाई अझ मजबुत बनाउने अपेक्षा व्यक्त गरेको छ ।
कार्यक्रममा विद्यालय प्रशासन, शिक्षक, अभिभावक तथा स्थानीय सरोकारवालाको सक्रिय उपस्थिति रहेको थियो ।
