बेनी, असार-१८, म्याग्दीको अन्नपूर्ण गाउँपालिकाले यस वर्षको माध्यमिक शिक्षा परीक्षा (एसईई) मा उत्कृष्ट अंक ल्याएर उत्तीर्ण भएका विद्यार्थीहरुलाई नगद पुरस्कारसहित सम्मान गरेको छ। मङ्गलबार गाउँपालिका केन्द्र पोखरेबगरमा आयोजित विशेष कार्यक्रममा २०८१ सालको एसईई परीक्षामा ३.६० जिपिए भन्दा माथि ल्याउने तीनजना विद्यार्थीलाई जनही २४ हजार रुपैयाँ नगद र प्रमाणपत्र प्रदान गर्दै सम्मान गरिएको हो।
सम्मानित हुने विद्यार्थीहरुमा वडा नं. ६ स्थित मुक्तिमार्ग माविबाट ललिता खड्का (३.८० जिपिए), वडा नं. १ कैलाश मावि दोबाबाट युना राम्जाली (३.७१ जिपिए) र सुजता राम्जाली (३.६५ जिपिए) रहेका छन्।
गाउँपालिकाका शिक्षा, युवा तथा खेलकुद शाखाका शिक्षा अधिकृत गणेशबहादुर कटुवालका अनुसार गाउँपालिकाले बनाएको कार्यविधिअनुसार उत्कृष्ट विद्यार्थी छानेर प्रत्येक वर्ष यसरी सम्मान गरिँदै आएको हो।
कार्यक्रममा गाउँपालिका अध्यक्ष भारतकुमार पुन, उपाध्यक्ष दिवाकुमारी पुन तिलिजा, प्रमुख प्रशासकीय अधिकृत रामप्रसाद शर्मा कँडेल,
र सामाजिक विकास संयोजक तथा वडा नं. २ का अध्यक्ष ओमप्रसाद फगामी लगायतले विद्यार्थीहरुलाई नगद पुरस्कारसहित सम्मान गर्नुभएको थियो।
अध्यक्ष पुनका अनुसार अघिल्ला दुई वर्षदेखि एसईईमा उत्कृष्ट जिपिए ल्याउने विद्यार्थीहरुलाई हौसला प्रदान गर्ने उद्देश्यले नगद पुरस्कार दिने गरिएको हो।
उहाँले आगामी आर्थिक वर्षदेखि कक्षा ११ मा गाउँपालिकाकै विद्यालयमा भर्ना हुने विद्यार्थीलाई नगद १० हजार र प्राविधिक धारतर्फ भर्ना हुनेलाई १५ हजार रुपैयाँ छात्रवृत्ति प्रदान गरिने कार्यक्रम रहेको जानकारी दिनुभयो।
यस वर्ष अन्नपूर्ण गाउँपालिकाबाट १२८ जना एसईई परीक्षार्थी सहभागी भएका थिए, जसमध्ये ९२ जना विद्यार्थी उत्तीर्ण भएका छन्। प्राविधिक धारतर्फ भने सतप्रतिशत विद्यार्थी उत्तीर्ण भएको शिक्षा शाखा संयोजक कटुवालले बताउनुभयो।
यसैबीच, राष्ट्रपति रनिङ शिल्ड प्रतियोगितामा प्रदेश र राष्ट्रियस्तरमा पदक प्राप्त गर्ने पाँच जना खेलाडीहरुलाई पनि गाउँपालिकाले नगदसहित सम्मान गरेको छ।
मुक्तिमार्ग मावि, घारका उसु खेलाडी आनन्द बरुवाल, सलिना बरुवाल, विशाल बरुवाल, प्रकृति खड्का, र बेबिका बरुवाललाई क्रमशः १० हजार, ५ हजार र ३ हजार रुपैयाँ नगदसहित प्रमाणपत्रद्वारा सम्मान गरिएको शिक्षा अधिकृत कटुवालले जानकारी दिनुभयो।
विद्यार्थी तथा खेलकर्मीहरुको मनोबल अभिवृद्धि गर्न गाउँपालिकाले गरेका यस्ता सम्मान कार्यक्रमले आगामी पुस्तालाई अझ प्रेरित र जिम्मेवार बनाउने अपेक्षा गरिएको छ।
