जलजला अआर, १८, पर्वतको जलजला गाउँपालिकाले पालिकाका शिक्षकहरुलाई ICT तालिम प्रदान गरेको छ । गाउँपालिका भित्रका आधारभूत तहका शिक्षकहरुलाई सूचना प्रविधिमा दक्ष बनाउने उद्देश्यसहित पाँच दिने आईसीटी तालिम सम्पन्न भएको हो ।
गाउँपालिकाका विद्यालयहरुलाई प्रविधिमैत्री बनाउँदै सूचना प्रविधिको प्रभावकारी प्रयोगमार्फत शिक्षाको गुणस्तर अभिवृद्धि गर्न तालिम आयोजना गरिएको हो।
तालिममा सहभागी शिक्षकहरुलाई ईमिस (EMIS) प्रणाली, माइक्रोसफ्ट वर्ड, एक्सेल, पावरपोइन्ट, शिक्षकका लागि कृत्रिम बुद्धिमत्ता (AI), साइबर सुरक्षा, गुगल कक्षा (Google Classroom), शिक्षा एलएमएस प्रणाली लगायतका आधुनिक प्रविधिहरुका विषयमा विस्तृत जानकारी र व्यवहारिक अभ्यास गराइएको थियो।
तालिमका प्रशिक्षक तथा जलजला गाउँपालिकाका सूचना प्रविधि अधिकृत सुदीप पौडेलका अनुसार, शिक्षकहरुलाई सूचना प्रविधिको प्रयोगमा दक्ष बनाउँदै डिजिटल शिक्षण–शिक्षण प्रणालीलाई प्रभावकारी बनाउने लक्ष्यसहित तालिम सञ्चालन गरिएको हो।
तालिममा गाउँपालिकाभित्रका विभिन्न आधारभूत विद्यालयबाट २५ जना शिक्षकहरुको सहभागिता रहेको थियो।
ज्योति मण्डल माविका शिक्षक लेथ बहादुर कार्कीले सहजीकरण गर्दै, शिक्षकहरुलाई विद्यालयमा आवश्यक पर्ने प्रविधियुक्त सीपलाई प्राथमिकता दिएर तालिम सञ्चालन भैरहेको जानकारी दिनुभयो।
तालिमसँगै गाउँपालिकाले आगामी आर्थिक वर्षका लागि स्मार्ट विद्यालय कार्यक्रम अन्तर्गत २ करोड ७० लाख रुपैयाँ बिनियोजन गरिसकेको गाउँपालिका अध्यक्ष राजु प्रसाद आचार्यले जानकारी दिनुभयो। उहाँले सामुदायिक विद्यालयको शिक्षामा गुणात्मक सुधार ल्याउने उद्देश्यले एकीकृत परीक्षा प्रणाली र लिडर विद्यालय नीति लागू गरिएको पनि बताउनुभयो।
सूचना प्रविधिको प्रभावकारी उपयोगले शिक्षण–शिक्षण प्रक्रियालाई सहज, रोचक र गुणस्तरीय बनाउने अपेक्षा गरिएको छ। जलजला गाउँपालिकाको यो पहलले ग्रामीण भेगका सामुदायिक विद्यालयमा डिजिटल शिक्षाको नयाँ युग आरम्भ हुने विश्वास लिइएको छ।
