म्याग्दीको सौन्दर्यमा प्रेमिल धुन: “नजिक सर्ने हो” सार्वजनिक

जलजला, असार १०, २०८२ – नेपाली सांगीतिक बजारमा नयाँ सिर्जनाका रूपमा “नजिक सर्ने हो” बोलको एक भावनात्मक प्रेम गीत सार्वजनिक भएको छ। यो गीतले प्रेम सम्बन्धमा देखिने कोमलता, लाज र आत्मीयतालाई सुन्दर ढंगले प्रस्तुत गरेको छ। यस गीतको मुख्य विशेषता म्याग्दी जिल्लाको प्राकृतिक तथा सहरी सौन्दर्यलाई मनमोहक ढंगले भिडियोमा उतारिएको छ।

गीतको भिडियो छायांकन म्याग्दी जिल्लाको सदरमुकाम बेनी बजार र बेनी नगरपालिकाभित्रका विभिन्न रमणीय स्थानहरूमा गरिएको छ। यसले गर्दा भिडियोमा म्याग्दीको अनुपम प्राकृतिक दृश्य र जीवन्त सहरी परिवेशको आकर्षक संयोजन देख्न सकिन्छ। यसले गीतलाई थप मौलिकता प्रदान गरेको छ।

सुमधुर स्वर र सशक्त सिर्जना

खिमा पुन, राजकुमार परियार र विजय परियारको सुमधुर स्वरले गीतलाई जीवन्त बनाएको छ। ध्रुव जिसीले निर्देशन गरेको यो गीतमा रवि कार्कीको लय सिर्जना र निश्चल  दवाडीको शब्दले प्रेम र सम्बन्धको गहिराइलाई प्रभावकारी रूपमा पस्केका छन्। काठमाडौंस्थित स्टुडियोमा रेकर्ड गरिएको यो गीतको संगीत संयोजन कृष्ण के.सी.ले गरेका हुन्।

आकर्षक भिडियो प्रस्तुति

भिडियोलाई आकर्षक बनाउन मनोज गुरुङ र मेनुका पुनले अभिनय गरेका छन्। उनीहरूको अभिनयले गीतको भावनात्मक पक्षलाई सशक्त ढंगले प्रस्तुत गरेको छ। सुरेश काफ्लेले भिडियोको छायांकन गरेका छन्, जसले दृश्यहरूलाई सौन्दर्यपूर्ण र भावनात्मक रूपले प्रस्तुत गर्न सफल भएका छन्।

सर्जकहरूका अनुसार “नजिक सर्ने हो” गीतले दुई व्यक्तिबीच बढ्दै गएको भावना, प्रेममा देखिने लाज, अप्ठ्यारोपन र भावनात्मक तानाबानालाई समेट्ने प्रयास गरेको छ। उनीहरूले प्रेमलाई सरल, आत्मीय र समकालीन तरिकाले प्रस्तुत गरेको दाबी गरेका छन्।

हालै डिजिटल प्लेटफर्ममार्फत सार्वजनिक गरिएको यो गीतले नेपाली गीतसंगीतमा नयाँ स्वाद र सौन्दर्य थपेको छ। विशेषगरी म्याग्दीको दृश्य र संस्कृतिलाई झल्काउने यो गीतले दर्शक-श्रोतामाझ छुट्टै प्रभाव पार्ने अपेक्षा गरिएको छ । रवी कार्की युट्युब च्यानलबाट सार्वजनिक गरिएको गीत २ दिन मै १० हजार भन्दा बढीले हेरिसकेका छन् ।

भिडियो