देवी जिसी/बेनी, बैशाख-१६, शिक्षाका लागि विश्वव्यापी कार्य सप्ताह (Global Action Week for Education) अन्तर्गत म्याग्दीको सदरमुकाम बेनीबजारमा सोमबार नागरिक समाजको भेला तथा प्रदर्शनी सम्पन्न भएको छ।
म्याग्दीमा सक्रिय सामाजिक संस्थाहरूको सहभागितामा आयोजित भेलामा विभिन्न शिक्षा सम्बन्धी संदेशहरू लेखिएका प्लेकार्ड बोकेर प्रदर्शनी गरिएको थियो। कार्यक्रममा विद्यालय र सिकाइ केन्द्रहरूमा अनलाइन शिक्षा प्रवर्द्धन, विद्यालयको पाठ्यक्रममा समसामयिक पुनर्विचार तथा परिमार्जन, शिक्षालाई दैनिक जीवनसँग जोड्दै गुणस्तरीय, समावेशी र जीवन उपयोगी शिक्षामा जोड दिनुपर्ने विषयमा विशेष ध्यानाकर्षण गराइएको थियो।
कार्यक्रमको शुभारम्भ गैह्रसरकारी संस्था महासंघ (एनजिओ फेडेरेसन) म्याग्दीका अध्यक्ष दिपक पौडेल र पूर्व अध्यक्ष हरिप्रसाद पौडेलले गरेका थिए। उनीहरूले कार्यक्रममा आ-आफ्ना मन्तव्य राख्दै अभियानको महत्व र शिक्षामा नागरिक समाजको भूमिकाबारे प्रकाश पारेका थिए।
प्रदर्शनीमा मिलन म्याग्दी, संगम म्याग्दी, कदम म्याग्दी, सञ्चारिका समूह म्याग्दी लगायत विभिन्न गैह्र सरकारी संस्थाहरूको सक्रिय एकता रहेको थियो।
एनसीई (National Campaign for Education) म्याग्दीका अध्यक्ष तथा अभियान संयोजक दिलु बिटालुका अनुसार गत वर्ष म्याग्दीमा प्रधानमन्त्रीलाई पत्राचार, सिट्ठी तथा मादल बजाएर जनचेतना अभिवृद्धि गर्ने कार्यक्रमहरू सञ्चालन गरिएको थियो भने यस वर्ष चित्रकला प्रदर्शनीसमेत गरिने योजना रहेको जानकारी दिनुभएको छ।
शिक्षाका लागि नागरिक जागरण र सरकारी प्रतिबद्धता सुनिश्चित गर्न स्थानीय स्तरमा यस्ता अभियानहरू अझ प्रभावकारी रुपमा सञ्चालन गरिने आयोजकहरूले बताएका छन्।
