पोखरा, बैशाख- १५, पोखरा महानगरपालिका वडा नं. १७, बिरौटास्थित हरिहर मन्दिर परिसरमा मानव सेवा फाउण्डेशनद्वारा आयोजित गण्डकी कोटिहोम महायज्ञ भव्य रूपमा सञ्चालन भइरहेको छ। वैशाख ३ गते भूमिपूजनपश्चात चैत्र २९ गतेदेखि अनुराधा पाण्डेद्वारा कथा वाचन सुरु भएको महायज्ञमा हाल देवी प्रतिभाले कथा वाचन गरिरहेकी छन्, जुन वैशाख १८ गतेसम्म चल्नेछ।
आगामी दिनहरूमा दीनबन्धु पोखरेल, चैतन्यकृष्ण महाराज लगायत राष्ट्रिय वक्ताहरूको समेत सहभागिता रहनेछ। सोमबार देवी प्रतिभाको वाचनमा भगवान कृष्ण जन्मोत्सव पनि मनाइएको थियो। साधु–सन्त, भक्तजन, स्वयंसेवक तथा स्थानीय समुदायको उत्साहपूर्ण सहभागिताले महायज्ञलाई पोखराको साझा धार्मिक-सांस्कृतिक उत्सवको रूपमा स्थापित गरेको छ।
महायज्ञ वैशाख १७ देखि औपचारिक उद्घाटन भई जेठ २६ गतेसम्म चल्नेछ। वैशाख १६ गते ११ हजार कलशसहित ऐतिहासिक शोभा कलश यात्रा शान्तिघाटबाट सुरु हुनेछ। यात्रामा सहभागी समूहहरूलाई पुरस्कारको व्यवस्था गरिएको छ।
कार्यक्रम अवधिभर श्रीमद्भागवत कथा, रामकथा, शिवमहापुराण लगायत धार्मिक प्रवचनहरू, हवन, ब्रतबन्ध, विवाह, चौरासी पूजा र कोटी दीप प्रज्वलनजस्ता कार्यक्रम सञ्चालन हुनेछन्। राष्ट्रिय तथा अन्तर्राष्ट्रिय कलाकारहरूले सांगीतिक प्रस्तुति दिनेछन्।
युवा सहभागिता बढाउन छोटा भिडियो प्रतियोगिता आयोजना गरिएको छ, जसमा उत्कृष्टलाई २५ हजार रुपैयाँसम्म पुरस्कार प्रदान गरिनेछ। महायज्ञ राष्ट्र शान्ति, धार्मिक पर्यटन प्रवर्धन तथा असहाय बालबालिका र ज्येष्ठ नागरिकहरूको संरक्षणार्थ आयोजना गरिएको हो।
