पोखरा, वैशाख ३, पोखरा महानगरपालिका–१७, विरौटामा सञ्चालन भइरहेको ऐतिहासिक श्री गण्डकी शत कुण्डीय गायत्री कोटिहोम विराट ज्ञान महायज्ञ अन्तर्गत आज एकै दिन तीनवटा महत्वपूर्ण धार्मिक कार्यहरू — क्षमा पूजन, भूमिपूजन र यज्ञ कुण्ड खनन विधिपूर्वक सम्पन्न भएका छन्।
यसअघि चैत २३ गते कोटिहोम महायज्ञका लागि तय गरिएको स्थानमा भूमिपूजन सम्पन्न भए तापनि विविध कारणले स्थान परिवर्तन गर्नुपरेको आयोजकले जानकारी दिएको छ। त्यसअनुसार महायज्ञ स्थल पोखरा–६, लेकसाइड क्षेत्रको बाराहीघाटतर्फ सारिएको हो।
नयाँ स्थानमा पहिलोपटक क्षमा पूजन कार्यक्रम बिहान सम्पन्न गरिएको थियो। त्यसपछि सिद्धेश्वर हरिहर मन्दिर परिसरमा बिहान ११ बजेर १ मिनेटको उत्तम साइतमा भूमिपूजन सम्पन्न गरिएको हो। उक्त साइत नेपाल पञ्चाङ्ग विकास समितिले तोकेको शुभ मुहूर्त हो।
त्यसपछिको शुभ साइतमा बिहान ११ बजेर ११ मिनेटमा यज्ञ कुण्ड खनन विधिवत रूपमा सम्पन्न गरिएको छ।
आज सम्पन्न भूमिपूजन समारोहमा विभिन्न धार्मिक गुरू–स्वामीज्यूहरू, पोखरा महानगरपालिका–१७ का अध्यक्ष राधिका शाही, स्थानिय सामाजिक संघ–संस्थाका प्रतिनिधिहरू, आमा समूहका सदस्यहरू र श्रद्धालुहरूको उल्लेख्य उपस्थिति रहेको थियो।
आयोजक मानव सेवा फाउण्डेसन नेपालले यस महायज्ञमार्फत धार्मिक, सांस्कृतिक र नैतिक चेतनाको प्रवाह गर्दै समाजमा शान्ति, सद्भाव र संस्कारको पुनर्जागरण गर्ने उद्देश्य लिएको जनाएको छ।
