म्याग्दीमा ३ जना नयाँ कुष्ठरोगी फेला: ९ देखि १८ महिना सम्म नियमित औषधी सेवन गरे निको हुने

बेनी, माघ-१४,   म्याग्दीमा  ३ जना  नयाँ कुष्ठरोगी फेला परेका छन्  । दशकअघि नै जनस्वास्थ्यको समस्याका रूपमा नरहेको  भनेर उन्मूलनको घोषणा गरिएको भएपनि  यसबर्ष जिल्लामा ३ जना नयाँ कुष्ठरोगी भेटिए संगै म्याग्दी  कुष्ठरोगको जोखिममा रहेको पाइएको हो  ।

कुष्ठरोगका नया विरामी पत्ता लाग्ने औषत आधारमा म्याग्दी जिल्ला पनि  कुष्ठरोग संक्रमणको जोखिममा रहेको छ । जिल्ला स्वास्थ्य कार्यालयले आइतवार आयोजना गरेको ७१ औं विश्व कुष्ठरोग दिवस सम्बन्धी एक कार्यत्रममा दिएको विवरण अनुसार प्रति एक लाख जनसंख्यामा एक जना कुष्ठरोगी पत्ता लाग्दा त्यो नियन्त्रण भित्र रहेको मानिन्छ । तर म्याग्दीमा त्यो संख्या बढी रहेको छ ।

चालु आवमा नयाँ बिरामी ३ जना सहित गतबर्षका नियमित औषधी सेवन गर्ने २ जना गरी ५ जना कुष्ठरोगील औषधि सेवन गर्ने गरेको स्वास्थ्य कार्यालयका परिवार नियोजन सुपरभाइजर गणेश सुबेदीले बताउनुभयो । माइइक्रोब्याक्टेरियम लेप्रे र माईक्रोब्याक्टेरियम लेप्रोम्याटोसिन जिवाणु ब्याक्टेरियाबाट मानिसको श्वासप्रश्वासको माध्यमबाट कुष्ठरोग सर्छ । समयमै उपचार गरे कुष्ठरोग निको हुन्छ । कुष्ठरोग लागेको पहिलो चरणका विरामीले ६ देखी ९ महिनासम्म नियमित औषधी र जटिल अवस्थाका विरामीले ९ देखी १८ महिनासम्म नविराई नियमित औषधी सेवन गर्नु पर्छ । तर हाम्रो समाजमा अझै पनि कुष्ठ रोगलाई देवीदेवताको श्राप र पूर्वजन्मको फल भनेर लिइने अनि खुलेर समस्या नबताउने हुँदा संख्या अझै पनि बढ्न सक्ने बताइएको छ ।

गण्डकी प्रदेशमा १० हजार जनसंख्यामध्ये उपचारमा रहेका जिल्लामा सबैभन्दा धेरै ० दशमलव १९ रहेकोे तथ्याङ्कले देखाएको छ।  १ भन्दा बढी कुष्ठरोगी भएको देशैभरका ११ जिल्लामा म्याग्दी समेत परेकाले जनचेतनामुलक अभियान र कुष्ठरोगीका बारेमा गलत सन्देशहरुलाई निरुत्साहित गर्नुपर्नेमा जोड दिइएको छ ।

कार्यक्रममा बेनी अस्पतालका कन्सल्टेन्ट सुपरिटेन्डन डा. नितेश श्रेष्ठ, स्वास्थ्य कार्यालयका लेखा अधिकृत तेजप्रसाद पौडेल, कोल्डचेन सुपरभाइजर बिरेन्द्रकुमार चौधरी, पत्रकार महासंघ म्याग्दीका अध्यक्ष प्रकाश पौडेल लगायतको उपस्थिती रहेको थियो ।