म्याग्दी, असार-१८, म्याग्दीको मंगला शिक्षा क्याम्पसले फलफूलको उत्पादन र बजार राम्रो देखेपछि क्याम्पसको खाली जग्गाको सदुपयोग गर्नफलफूल खेती सुरु गरेको छ ।मंगला गाउँपालिका–२, बावियाचौर लाम्पाटास्थित क्याम्पसको भौतिक संरचना, खेलमैदान सहित प्रयोग हुने जमिन बाहेक करिब ४ रोपनी जमिनमा माटो सुहाउँदो फलफुल रोपण कार्य सु्रु गरेको हो ।
क्याम्पसमा अध्ययनरत विद्यार्थीलाई आफ्नो जन्मदिनको अवसरमा फलफूलको बिरुवा रोपणको अभियानसँगै क्याम्पस प्रशासन लगायत विभिन्न निकायको सहयोगमा बाँझो जमिनको सदुपयोग गदैं विभिन्न प्रजातिको फलफूल लगाउन थालिएको क्याम्पस प्रमुख पितमबहादुर खत्रीले बताउनुभयो ।
‘क्याम्पसको प्राङ्गणको माथिल्लो क्षेत्रमा फलफूल खेती सुरु गरिएको छ, पहिलो चरणमा करिब ८० बोट लगाइयो,’ प्रमुख खत्रीले भन्नुभयो । उहाका अनुसार क्याम्पसका स्टाफ, विद्यार्थीबाट एक व्यक्ति एक फलफुलको बिरुवारोपण सहितका अभियान सञ्चालन गरी रेखदेख सहितका प्राविधिक सहयोगमा स्वतन्त्र विद्यार्थी यूनियनको सहयोग लिने बताउनुभयो ।
अभियानको पहिलो दिन गाउँपालिका अध्यक्ष सतप्रसाद रोकाले उत्पादनमार्फत समृद्धिको बाटोमा रहेको गाउँपालिकाले फलफूल खेती कार्यक्रमलाई सघाउने समेत बताउनुभयो । उहाँले क्याम्पसभित्रको माटोमा उत्पादन हुने विभिन्न प्रजातिका फलफुलका बिरुवाहरु रोपणसँगै नियमित संरक्षणका कार्यक्रमहरु समेत गर्नुपर्ने बताउनुभयो ।
क्याम्पसका सञ्चालक समितिका अध्यक्ष यामबहादुर थापाले ४ रोपनी जग्गाभित्र प्राविधिकको सहयोगमा जैविक मलको प्रयोग सहित सीप विकास र प्रवद्र्धनका लागि गाउँपालिका र सरकारी निकायको समेत सहयोगको प्रतिबद्धता रहेको जनाउनुभयो । क्याम्पसले पहिलो चरणमा आँप, लिची, कागती,अम्बा,कटुसु,एभोगाडा लगायतका विभिन्न प्रजातिको फलफुल रोपण गरेको छ ।
भौतिक पूर्वाधार विस्तारमा तीब्र गतिले अगाडी बढेको क्याम्पसले विश्वविद्यालयले गुणस्तर सुनिश्चितता तथा प्रत्यायन प्रणाली(क्यूएए) प्रमाणपत्र प्राप्तिको अभियानमा समेत जुटेको छ । समुदायको सक्रियतामा ३३ रोपनी जमिन खरिद गरेको क्याम्पसको भबन, प्रशासनिक भवन, छात्राबासबाहेक अन्य संरचनाहरु आसपासका साथै माथिल्लो क्षेत्रमा रहेको खरबारीमा समेत आय-आर्जनमा सघाउने गरी यो बर्षभरी विभिन्न प्रजातिको फलफुल तथा औषधिजन्य हर्बल विरूवा रोपण गर्ने जनाएको छ ।
