म्याग्दी, जेठ-३, नेपाल पत्रकार महासंघ, म्याग्दीको भवन शिलान्यास कार्यक्रम रोकिएको छ । अस्थायी संरचना बनाउने गरी जेठ ३ गते आज (बुधबार) तय गरिएको शिलान्यास कार्यक्रम नेत्रबिक्रम चन्द (विप्लव) नेतृत्वको नेपाल कम्युनिष्ट पार्टी (नेकपा) म्याग्दीको अबरोधका कारण स्थगित भएको हो । बेनी नगरपालिकाले महासंघलाई दश वर्षका लागी भाडामा उपलब्ध गराएको वडा नम्बर ७ स्थित (खाद्द संस्थानको गोदाम भएको) जग्गामा ४ आना जग्गा अन्तर्गत भवन बाहेक खाली जगामा अस्थायी संरचना निर्माण गर्नेगरि शिलान्यास कार्यक्रम तय गरिएकोमा अबरोध सृजना भएपछि स्थगित भएको महासंघले जनाएको छ ।
अबरोध पश्चात पत्रकार महासंघले एक बिज्ञप्ती जारीगर्दै, तय भएको कार्यक्रम र अतिथिहरुलाई पत्राचार समेत गरिसकेको अबस्थामा तिन बर्षदेखी महासंघ म्याग्दीले सम्झौता अनुसार नगरपालिकालाई वार्षिक १० हजार भाडा तिर्दै आइरहेको जग्गामा अवरोध नहटेपछि शिलान्यास कार्यक्रम नै स्थगित गरिएको जनाएको छ ।
“सम्झौता गरेर आफुले भाडा तिर्दै आएको जग्गामा संरचना निर्माण गर्न खोज्दा अबरोध हुनु कानुनी राज्यको उपहास हो” अध्यक्ष प्रकाश पौडेलले बताउनुभयो । भवन बनाउनका लागी गण्डकी प्रदेश सरकारले चालु आर्थिक वर्षमा रु. दश लाख बिनियोजन गरेको छ भने गत बर्षको विनियोजित रकम पनि योजना कार्यान्वयन हुन नसक्दा फिर्ता भएको पौडेलले बताउनुभयो ।
भवन शिलान्यासको कार्यक्रम तय गरेर पत्राचार भैसकेको अवस्थामा नेकपा म्याग्दीले जेठ १ गते उक्त जग्गाको सम्वन्धमा रहेको समस्याका बारेमा सरोकारवाला संग आवश्यक छलफल गर्न भनि महासंघलाई पत्राचार गरेपछि मंगलवार जिल्ला प्रशासन कार्यालयमा सर्वपक्षीय बैठक बसेर छलफल भएको थियो ।
प्रमुख जिल्ला अधिकारी तुलसीराम पौडेलको अध्यक्षतामा नगरप्रमुख सुरत केसी लगायत, प्रहरी, अनुसन्धान कार्यालयका प्रमुख, महासंघ र नेकपाका प्रतिनिधिहरुबिच भएको बैठक कुनै निर्णय विना टुंगीएको । बैठकमा नेकपाका प्रतिनिधि लालु किसान र उषा घर्तीले खाद्द संस्थानबाट जसले जग्गा खरिद गरेको हो उक्त व्यक्तिले आफुहरुलाई जग्गा दिने लिखित सहमति गरेकोले सो सहमति कार्यान्वयन नभएसम्म सहमती नजनाउने अडान राखेका छन । तर नगरप्रमुख केसीले एक महिनाभित्र जग्गा खाली गर्ने प्रतिबद्धता जनाएपछि भवन शिलान्यास कार्यक्रमलाई तत्काललाई स्थगीत गरिएको महासंघले विज्ञप्ती मार्फत जनाएको छ ।
