नेकपा दुई चिरामा विभाजन भएसँगै आधिकारिक नेकपा को भन्ने विवाद सुरु भएको छ । सोही विवाद सुरु भएसँगै दुवै पक्षले देशभरका पार्टी कार्यालयमा तालाबन्दी गर्न थालेका छन् ।
तत्कालीन नेकपा माओवादी केन्द्र र नेकपा एमालेबीच ३० महिनाअघि पार्टी एकीकरण भएको थियो । तर, मंगलबार प्रधानमन्त्री एवं अध्यक्ष केपी ओली र कार्यकारी अध्यक्ष पुष्पकमल दाहाल ‘प्रचण्ड’ – माधव नेपाल समूहले बेग्लाबेग्लै बैठक गरेर औपचारिक रूपमा पार्टी विभाजनमा लागे ।
प्रचण्ड-माधव समूहको केन्द्रीय समितिको बैठकले अध्यक्ष ओलीलाई पदबाट हटाएर उनको ठाउँमा नेपाललाई अध्यक्ष बनाउने निर्णयसमेत गरेको छ ।
उता, ओलीले प्रचण्ड-माधवलाई १ पुसमै कारबाही गरेको पत्र निर्वाचन आयोगमा बुझाएको सार्वजनिक भएको छ । नेकपा विभाजनपछि आधिकारिक नेकपा को भन्ने अब निर्वाचन आयोगले फैसला गर्ने छ ।
पार्टीको केन्द्रीयदेखि जिल्ला कार्यालयसम्म ताला
पार्टी विभाजन भएपछि पार्टी कार्यालय कब्जामा लागेका छन् नेकपाका नेता तथा कार्यकर्ता । नेकपा केन्द्रीय पार्टी कार्यालय धुम्बाराहीमा ओली पक्षले ताला लगाएको छ । सोमबारदेखि नै धुम्बाराहीको पार्टी कार्यालयमा ओली पक्षले ताल लगाएका हुन् ।
धुम्बाराही पार्टी कार्यालय तत्कालीन नेकपा एमालेको केन्द्रीय कार्यालय हो । तत्कालीन माओवादी केन्द्रको पार्टी कार्यालय कोटेश्वरस्थित पेरिसडाँडामा छ । पार्टी एकीकरणपछि भने देशभर नै नेकपाका पार्टी कार्यालय साझा भएका थिए ।
अहिले पूर्वमाओवादी पक्ष मात्र नभएर पूर्वएमालेका वरिष्ठ नेता माधवकुमार नेपाल, झलनाथ खनालसहितको ठूलो हिस्सा विभाजन भएका कारण पार्टी कार्यालयका निम्ति ठूलो झगडा हुने देखिएको छ ।
कैलालीको धनगढीस्थित नेकपा पार्टी कार्यालयमा दुवै पक्षले ताला लगाएका छन् । ओली पक्षले मंगलबार पहिले ताला लगाएलगत्तै प्रचण्ड-नेपाल पक्षले समेत कार्यालयको मूल ढोकामै ताला लगाएका छन् । कैलालीका पार्टी अध्यक्ष ओली पक्षका रतन थापाले सुरुमा ताला लगाएका थिए ।
पछि यसअघि कारबाहीमा परेका दीर्घ सोडारीको कारबाही प्रचण्ड–नेपाल समूहले फुकुवा गरेलगत्तै उनीहरूले पनि ताला लगाएका हुन् । प्रदेश पार्टी कार्यालयमा भने प्रचण्ड-नेपाल समूहले ताला लगाएका छन् ।
त्यसरी नै ओली पक्षधर कार्यकर्ताले नै काभ्रेस्थित जिल्ला पार्टी कार्यालयको मूल गेटमा ताला लगाएका छन् । मंगलबार ओलीनिकट जिल्ला कमिटी सदस्य कञ्चन अधिकारीको नेतृत्वमा गएका जिल्ला नेताहरूले कार्यालय पुगेर ताला लगाएका हुन् ।
उता, सोमबार नै लमजुङको पार्टी कार्यालय मदन-आश्रित भवनमा ओलीनिकट युवा र विद्यार्थीले ताला लगाएका छन् । तालापछि पार्टीका जिल्ला अध्यक्ष मधु अघिकारीलाई समेत कार्यालयमा छिर्न दिएका छैन । तत्कालीन एमाले र माओवादीको एकीकरण हुँदा दुई दलको सहमतिअनुसार लमजुङमा माओवादीकी अघिकारीले अध्यक्षको जिम्मा पाएकी थिइन् ।
त्यस्तै, बुधबार ओली समूहका कार्यकर्ताले सिन्धुलीको नेकपा पार्टी कार्यालय कब्जा गरेका छन् । कमलामाइ नगरपालिका ६ मा रहेको नेकपा कार्यालय आजाद स्मृति भवन ओली समूहले कब्जामा लिएको हो । पार्टी एकीकरण हुँदा सिन्धुली अध्यक्ष तत्कालीन माओवादीलाई पाएको थियो ।
सुरक्षा निगरानीमा पार्टी कार्यालय
पार्टी कार्यालयमा दुई पक्षले तालाबन्दी गर्न थालेपछि अप्रिय घटना हुन सक्ने भन्दै प्रहरीले देशभरका नेकपा पार्टी कार्यालयमा निगरानी बढाएको छ । कार्यालयको नाममा झडपको अवस्था सिर्जना हुन सक्ने भन्दै देशभरका पार्टी कार्यालयमा निगरानी बढाइएको प्रहरी प्रवक्ता एसएसपी बसन्तबहादुर कुँवरले जानकारी दिए ।
‘हामीले देशभरका प्रहरी कार्यालयलाई सम्भावित घटना हुनसक्ने क्षेत्रको निगरानी र सुरक्षा सतर्कता अपनाउन निर्देशन भएको छ । सोहीअनुसार हामीले प्रहरी परिचालन गरेका छौँ,’ प्रवक्ता कुवँरले भने ।
प्रधानमन्त्री ओलीका प्रेस संयोजक सूर्य थापाले भने अहिले नै पार्टी कार्यालबारे कसैले बोल्न नहुने तर कार्यालय आधिकारिक पार्टीकै हुने बताए ।
-सिलापत्र अनलाइनबाट
