पर्वत, साउन-२, पर्वत जिल्लमै स्नातकोत्तर तह पढ्न पाइने भएको छ । गुप्तेश्वर बहुमुखी क्याम्पसले स्नातकोत्तर तहको अध्यापन सुरु गर्न थालेको हो । पर्बत मै मास्टर्स तहको पढाइ शुरु हुने भएपछि स्नातकोत्तर गर्नका लागि अन्य जिल्लामा जानुपर्ने बाध्यता हट्ने भएको छ ।
सदरमुकाम कुश्मामा रहेको क्याम्पसले व्यवस्थापन सङ्कायमा स्नातकोत्तर तहको पढाई सुरु गर्नको लागि हालै मात्र त्रिभुवन विश्वविद्यालयबाट अनुमति प्राप्त गरेको क्याम्पस सञ्चालक समितिका अध्यक्ष वसन्तकुमार कर्माचार्यले बताउनुभएको छ । अध्यक्ष कर्माचार्यले सेमेस्टर प्रणालीमा पढाई हुने र कार्यगत मान्छेहरूलाई समेत लक्षित गरी कक्षा चलाइएकोले साँझको समयमा कक्षा सञ्चालनको तयारी भइरहेको बताउनुभयो । सदरमुकामका विभिन्न वित्तीय संस्थामा काम गर्दै आएका कर्मचारीहरूले स्नातक गरेर जागिरमा लागेपछि स्नातकोत्तर पढ्न जान समय नपाएकाले त्यस्ता व्यक्तिलाई समेत एमबीएसको लक्ष्यमा राखिएको उहाँको भनाई छ।
कक्षाहरूमा इलेकट्रोनिक बोर्ड, ओभर हेड प्रोजेक्टरसहित, कम्प्युटर, आधुनिक पुस्तकालय अलिक स्ट्यान्डर्ड सुविधा राख्ने र त्रिविको कार्यक्रम अनुसार अबको एक महिनापछि भर्ना कार्यक्रम सुरु गरिने क्याम्पस प्रमुख सुवास पन्तले बताउनुभयो ।
पुस्तकालय व्यवस्थापनका लागि प्रदेश सरकारबाट १० लाख रुपैयाँ विनियोजन भएको तथा क्याम्पस रहेको कुश्मा नगरपालिकामा समेत यसमा सघाउनको लागि सक्दो बजेटको कुरा भइरहेको उहाँको भनाइ छ । सुरुमा कम्तीमा पनि पाँच करोडको अक्षयकोष निर्माण गर्ने र पहिलो ब्याचमा कम्तीमा पनि ५० जना विद्यार्थी भर्ना गर्ने गरी प्रयास थालिएको क्याम्पस प्रशासन बताएको छ ।
स्नातकोत्तर तह अध्ययनको लागि पोखरा र काठमाडौं नै जानुपर्ने बाध्यताको माझमा सदरमुकाममै कुश्मामा उच्च तहको शिक्षा पाउँदा आफूहरूलाई हौसला मिलेको स्नातक तह उत्तीर्ण गरेर विभिन्न पेशा ब्यबसयामा संलग्न युवाले बताएका छन् । दिनभर आफ्नो पेसा व्यवसाय गरेर साँझको समयमा नजिकै डिग्री पढ्न पाउनु सबैको लागि सुखद पक्ष रहेको उनीहरुको भनाई छ ।
