म्याग्दी, जेठ ५ गते – जिल्लाको बेनी नगरपालिकामा विद्यार्थी अभावका कारण दुई वटा सामुदायिक विद्यालय बन्द भएका छन्। बेनी–५ को माथिल्लो गाजनेमा रहेको जगन्नाथ आधारभूत विद्यालय र वडा नम्बर १० को ओखले आधारभूत विद्यालय बन्द भएका हुन्।
सुविधासम्पन्न भवन, इन्टरनेट, विद्युत्, खानेपानी, शौचालय र कम्प्युटरलगायतका सबै पूर्वाधार उपलब्ध भएका भए पनि बसाइसराइका कारण ग्रामीण क्षेत्रका सामुदायिक विद्यालयमा प्रत्येक वर्ष विद्यार्थी संख्या घट्दै गएको देखिन्छ।
नयाँ शैक्षिक सत्रमा कुनै पनि विद्यार्थी भर्ना नहुँदा दुवै विद्यालयका शिक्षकहरूलाई नजिकैका अन्य विद्यालयमा समायोजन गरिएको बेनी नगरपालिकाका शिक्षा अधिकृत कमल ढकालले जानकारी दिनुभयो ।
“विद्यार्थी संख्या कम हुँदा गत शैक्षिक सत्रमा बन्द भएका जगन्नाथ र ओखले आधारभूत विद्यालयमा कक्षा १–३ घटुवा गरेर बालकक्षा मात्र सञ्चालन गरिएको थियो,” उहाँले भन्नुभयो, “यस पटक बालकक्षामा पढ्ने विद्यार्थी पनि नभएकाले विद्यालयहरू बन्द गर्नुपरेको हो।”
नगर प्रमुख सुरत केसीका अनुसार, आवश्यक विद्यार्थी संख्या नपुगेकाले शैक्षिक सत्र २०७९ मा ११ वटा र २०८० मा सात वटा विद्यालयको कक्षा स्तर समायोजन (घटुवा) गरिएको थियो।
नगर प्रमुख केसीले बताएअनुसार तीव्र बसाइसराइ, निजी विद्यालयहरूको बढ्दो आकर्षण, अभिभावकहरूको भरोसा जगाउन नसक्नु, अंग्रेजी माध्यमबाट शिक्षा दिन नसक्नुजस्ता कारणले सामुदायिक विद्यालयहरू संकटमा परेका छन्। साथै विषयगत शिक्षकको अभाव पनि अर्को मुख्य समस्या भएको उहाँले उल्लेख गर्नुभयो । श्रोत: विद्यार्थी अनलाइन
