म्याग्दी, बैशाख-२२, म्याग्दी जिल्लाको बेनी नगरपालिका वडा नं ८ गणेशटोल निवासी ३३ वर्षीय सतिश श्रेष्ठलाई २३ दिनपछि परिवारले फेला पारेका छन्। सतिशका दाजु शैलेश श्रेष्ठले सामाजिक सञ्जालमार्फत भाइ सतिश फेला परेको जानकारी दिएका हुन्।
गत चैत्र ३१ गते सतिश श्रेष्ठ बेनीबाट पोखराका लागि हिँडेका थिए। त्यसको दुई दिनपछि, बैशाख १ गते पोखरा महानगरपालिका–६ स्थित होटल स्नो पिक, टाटु खोपेमा उनी देखिएको सिसीटिभी फुटेज फेला परेको थियो। यद्यपि, त्यसपछि उनी पोखराबाट सम्पर्कविहिन भएका थिए, जसले गर्दा परिवारजन अत्यन्त चिन्तित बनेका थिए।
सतिश बेनीस्थित एक निजि विद्यालयका शिक्षक समेत हुन्। सम्पर्कविहीन भएपछि परिवारले उनी भारततर्फ गएको आशंका गर्दै विभिन्न सहरहरूमा खोजीकार्य थालेका थिए। परिवारका सदस्यहरूले भारतका मुम्बई, दिल्ली, सिक्किम, कलकत्ता लगायतका विभिन्न ठाउँमा पुगेर खोजीकार्य गरेका थिए।
अन्ततः हराएको २३ दिनपछि परिवारले सतिशलाई फेला पार्न सफल भएका छन्। तर, उनलाई कहाँ र कस्तो अवस्थामा फेला पारियो भन्ने विस्तृत विवरण परिवारले खुलाएको छैन। परिवारजनले भने सतिशको अवस्था सामान्य रहेको र थप विवरण उचित समयमा सार्वजनिक गरिने जनाएका छन्।
यस घटनाले परिवारजन मात्र होइन, बेनी र आसपासका समुदायमा समेत चासो र चिन्ता उत्पन्न गराएको थियो। सामाजिक सञ्जाल र विभिन्न माध्यमहरूमा सतिशको खोजीका लागि अपिल समेत गरिएको थियो। हाल सतिश सुरक्षित रूपमा परिवारको सम्पर्कमा फर्किएका छन् भने उनका सहकर्मी, विद्यार्थी र शुभचिन्तकहरूले राहतको सास फेरेका छन्।
