भारतको अहमदाबादस्थित सरदार वल्लभभाई पटेल अन्तर्राष्ट्रिय विमानस्थल नजिकै एयर इन्डियाको एउटा बोइङ ७३७ विमान दुर्घटनामा परेको छ। यो विमान बेलायतको लन्डनका लागि उडेको थियो।
गुजरातको राजधानी अहमदाबाद नजिकैको मेघानीनगरमा आज दिउँसो यो दुर्घटना भएको हो। भारतीय सञ्चार माध्यम ‘द टाइम्स अफ इन्डिया’का अनुसार विमानमा २३० यात्रु, २ पाइलट र १० जना चालक दलका सदस्य गरी कुल २४२ जना सवार थिए।
दुर्घटनाको कारण अझै पुष्टि भइसकेको छैन। प्रत्यक्षदर्शीका अनुसार, दुर्घटनास्थलमा ठूलो आगलागी भएको र कालो धुवाँको मुस्लो टाढाबाटै देखिएको थियो। विमानको अधिकांश भाग जलेकाले विमानमा सवार सबै यात्रु तथा चालक दलका सदस्यहरूको मृत्यु भएको आशङ्का गरिएको छ।
हाल दुर्घटनास्थलमा उद्धार कार्य जारी छ। अग्नी नियन्त्रकहरू आगो नियन्त्रण गर्ने प्रयास गरिरहेका छन्। विस्तृत विवरण आउन बाँकी छ।
