बाग्लुंग भदौ-२३, एक करोड रूपैयाँभन्दा बढी लगानीमा बागलुङमा साबुन उद्योग सञ्चालनमा आएको छ । काठेखोला गाउँपालिका–७ रेशका तीर्थ गौतम र तारा शर्माले दुई वर्षदेखि कालिका साबुन उत्पादन गर्दै आएका हुन् ।
स्नाकोत्तर उत्तीर्ण दम्पती गौतम र शर्माले धेरै साथीहरू विदेशिने क्रममा आफूहरू भने स्वदेशमै उद्यम गर्ने निर्णय गरेका हुन् । विसं २०७८ मा दर्ता गरिएको टिएण्डटी म्यानुफ्याक्चरिङ उद्योग २०८० सालदेखि साबुन उत्पादनमा आएको हो । हाल यस उद्योगमा ६ जना स्थानीयले रोजगारी पाएका छन् ।
बागलुङ बजारको हल्लनचोक नजिकै रहेको उद्योगले भाँडा र कपडा धुने साबुन उत्पादन गरी बागलुङ, म्याग्दी र पर्वतका प्रमुख बजारमा बिक्री गर्दै आएको छ । हाल दुई सय ग्रामको कपडा धुने कालिका साबुन ५० रूपैयाँमा बिक्री भइरहेको छ ।
उद्योग सञ्चालक तीर्थ गौतमका अनुसार कच्चा पदार्थ भारत र काठमाडौँबाट आयात गरिन्छ भने वार्षिक करिब ५० लाख रुपैयाँको कारोबार भइरहेको छ । निकट भविष्यमा सरफ, हार्पिक र कुलिन उत्पादन गर्ने योजना रहेको उद्योगका सञ्चालक तारा शर्माले बताउनुभयो ।
स्वदेशमै स्वरोजगार सिर्जना गर्दै उद्योग विस्तारमा जुटेका तीर्थ र ताराको भनाइ छ – “अहिले विदेशिने लहर बढेको छ, तर हामीले नयाँ कामको सुरुवात यहीँबाट गर्नुपर्छ भन्ने सोचका साथ साबुन उद्योग सञ्चालन गरेका हौँ । यसले गाउँठाउँका स्थानीयलाई रोजगारी दिन मद्दत पुग्छ ।”
