बेनी, भदौ-१०, म्याग्दीको बेनी नगरपालिका–७ मंगलाघाटस्थित कमल जैसी थानमा अब भक्तजनलाई बस्न सहज हुने भएको छ।
राष्ट्रिय सौन्दर्यकर्मी युनियन नेपाल, बेनी नगर कमिटीले तीजको अवसरमा आयोजित शुभकामना आदान–प्रदान तथा दर खाने कार्यक्रममा दुईवटा बेन्च हस्तान्तरण गरेको हो।
युनियनकी अध्यक्ष मैना देवी राई सोनियाका अनुसार भड्किलो चाडपर्व मनाउने भन्दा पनि सहयोगमार्फत अर्थपूर्ण योगदान दिने उद्देश्यले दिदीबहिनीहरुले संकलन गरेको रकम प्रयोग गरिएको हो।
यसअघि पनि संस्थाले विभिन्न सामाजिक कार्य गर्दै आएको र भविष्यमा अझ अर्थपूर्ण कार्यक्रम अघि बढाइने अध्यक्ष राईले बताउनुभयो।
कार्यक्रममा बेनी नगरपालिकाकी उपमेयर ज्योति लामिछानेसहित वेस्ट कस्मेटिक्स बाग्लुङ, जय मा लक्ष्मी सुनचाँदी पसल, अस्ट्रेलियाबाट निसा कार्की, पोर्चुगलबाट गोविन्द विस्वकर्मा, गलेस्वरका सुवास मल्ल र भारतकी सजिना विस्वकर्माले आर्थिक सहयोग गरेका थिए।
बेन्च हस्तान्तरणसँगै थानमा पूजाआजा गर्न आउने भक्तजनलाई विशेष सुविधा हुने अपेक्षा गरिएको आयोजकको भनाइ छ।
