म्याग्दी, भदौ-७, हरितालिका तीज पर्वको अवसरमा म्याग्दी बहुमुखी क्याम्पसमा आइतबार विद्यालयस्तरीय तीज नृत्य प्रतियोगिता सम्पन्न भएको छ । क्याम्पसको आयोजनामा र बेनी नगरपालिकाको सहआयोजनामा भएको प्रतियोगितामा जिल्लाका १६ वटा विद्यालयले सहभागिता जनाएका थिए ।
प्रतियोगितामा बेनीस्थित प्रकाश माध्यमिक विद्यालय प्रथम, बेनी सामुदायिक मावि द्वितीय, बेनी बोर्डिङ सेकेण्डरी स्कुल तृतीय, र माउण्ट एभरेष्ट आवासीय मावि तथा न्यू होराईजन आमावि पर्वत सान्त्वना भएका छन् । विजयी विद्यालयहरूले क्रमशः १० हजार, ८ हजार, ६ हजार र ३–३ हजार रुपैयाँसहित प्रमाणपत्र प्राप्त गरेका छन् ।
कार्यक्रमलाई सम्बोधन गर्दै बेनी नगरपालिकाकी उपप्रमुख ज्योति लामिछानेले तीज पर्वलाई मौलिक ढङ्गले मनाउँदै पुस्तान्तरण गर्नुपर्नेमा जोड दिनुभयो । नगरपालिकाका शिक्षा, युवा तथा खेलकुद शाखा प्रमुख क्षेत्रबहादुर भण्डारीले तीज पर्वको नाममा हुने विकृति रोक्न सबै सजग हुनुपर्ने धारणा राख्नुभयो ।
सोही अवसरमा गलेश्वरस्थित जडभरत शालग्राम गण्डकी वेदविद्याश्रमका कलाकारलाई नगद ३ हजार र प्राध्यापक गोरखनाथ सुवेदीले १ हजार रुपैयाँ प्रोत्साहनस्वरुप प्रदान गर्नुभएको थियो ।
प्रतियोगिताको निर्णायकमा शिक्षिका कमला जिसी खत्री रहनुभएको थियो भने कार्यक्रम क्याम्पस प्रमुख श्रीधर सुवेदीको अध्यक्षता, उपप्राध्यापक रेखाकौशल रेग्मीको स्वागत र प्राध्यापक नारायण पौडेलको सञ्चालनमा सम्पन्न भएको हो । तीज पर्वको अवसरमा सहभागीहरुलाई दर खुवाइएकै साथै सामूहिक नाचगान पनि गरिएको थियो ।
