बेनी (म्याग्दी), भदौ २७,
जेन जेडको आन्दोलनका कारण लामो समयदेखि बन्द रहेका म्याग्दीका निजी विद्यालयहरू भदौ २९ गते आइतबारदेखि सञ्चालनमा आउने भएका छन्।
प्याब्सन म्याग्दीले शुक्रबार एक सूचना जारी गर्दै देशमा विकसित असहज परिस्थितिका कारण स्थगित भएका शैक्षिक क्रियाकलाप फेरि नियमित गर्न निर्णय भएको जनाएको छ। “स्थिति सामान्य बन्दै गएको र जनजीवन सहजतर्फ फर्किँदै गएको अवस्थामा विद्यालय सञ्चालन गर्ने निर्णय गरेका हौँ,” प्याब्सन म्याग्दीका अध्यक्ष हिरा पुनले जानकारी दिनुभयो।
गत भदौ २३ गते जेन जेड आन्दोलनका क्रममा मुलुकभरका विद्यालयहरू बन्द भएका थिए। त्यसपछि आन्तरिक परीक्षा सञ्चालन भइरहेका कतिपय विद्यालयहरू बाध्यतावश स्थगित हुनुपरेको र कतिपयले परीक्षा सुरु गर्ने तयारीमै रोकिएका कारण विद्यार्थीको शैक्षिक यात्रा प्रभावित भएको प्याब्सनले जनाएको छ।
यसैबीच, जलजला गाउँपालिकाका विद्यालयहरूले पनि सार्वजनिक सूचना प्रकाशन गर्दै आइतबारदेखि विद्यालय सञ्चालनमा आउने जानकारी दिएका छन्।
अहिले अधिकांश विद्यालयहरूमा पहिलो त्रैमासिक परीक्षा नजिकिँदै गएको र त्यसपछि दशैँ–तिहारजस्ता लामो पर्व बिदा सुरु हुने भएकाले विद्यालय संचालनलाई ढिला गर्न नसकिने विद्यालय व्यवस्थापन समितिहरूले बताएका छन्।
