नेपाल निजामती कर्मचारी युनियन म्याग्दीले आफ्नो ३६ औं स्थापना दिवस विशेष शैलीमा मनाएको छ । युनियनले बिहीबार बेनी नगरपालिका–५, बगुवाखोलास्थित बाल जागृती आधारभूत विद्यालयमा सञ्चालन भइरहेको बौद्धिक अपाङ्गता स्रोत कक्षामा अध्ययनरत विद्यार्थीलाई खाद्यान्न सामग्री सहयोग गरेको हो ।
विद्यालय परिसरमा आयोजित कार्यक्रममा नेपाली कांग्रेस म्याग्दीका उपसभापति केवी भण्डारी, प्रदेश सभा क्षेत्र ‘ख’ का सभापति टंकप्रसाद पुन, कर्मचारी युनियन म्याग्दीका अध्यक्ष सुमन सुवेदीलगायतले विद्यालयका प्रमुख धनबहादुर क्षेत्री र विद्यार्थीलाई चामल, तेलसहित दैनिक उपभोग्य खाद्यान्न सामग्री वितरण गर्नुभयो ।
उपसभापति भण्डारीले स्थापना दिवसको अवसरमा शुभकामना व्यक्त गर्दै युनियनको सहयोग प्रशंसनीय रहेको बताउनुभयो । उहाँले अपाङ्गता भएका बालबालिकाको शिक्षा, स्वास्थ्य र आधारभूत आवश्यकताप्रति राज्य, समाज र अभिभावक सबै जिम्मेवार बन्नुपर्नेमा जोड दिनुभयो ।
यस वर्ष फरक क्षमताका बालबालिकालाई सहयोग पु¥याउने उद्देश्यले २० हजार रुपैयाँभन्दा बढीको खाद्यान्न सामग्री वितरण गरिएको अध्यक्ष सुवेदीले जानकारी दिनुभयो ।
विद्यालय प्रमुख क्षेत्रीले सहयोगप्रति धन्यवाद व्यक्त गर्दै हाल स्रोत कक्षामा २१ जना अपाङ्गता भएका र ३१ जना सामान्य गरी ५२ विद्यार्थी अध्ययनरत रहेको जानकारी दिनुभयो । उहाँले आवासीय सुविधा उपलब्ध भए पनि थप संरचना र सामग्रीको आवश्यकता रहेको उल्लेख गर्नुभयो ।
कार्यक्रममा युनियनका सल्लाहकारहरु किरणचन्द्र सुवेदी, सञ्जीव बास्तोला, रमेश बस्नेत, अमृत कँडेल, विद्यालय व्यवस्थापन समिति अध्यक्ष विज्ञान केसीलगायतको सहभागिता रहेको थियो । कार्यक्रम सहसचिव तारा बानियाँ (जगत)ले सञ्चालन गर्नुभएको थियो भने उपाध्यक्ष प्रदीप गौतमले स्वागत गर्नुभएको थियो ।
