जलजला भदौ-११, पर्वतको जलजला गाउँपालिका–५ लेकफाट रातामाटामा तीज मेला भव्य रूपमा सम्पन्न भएको छ । पुतालिबिहान रातामाटा टोल विकास संस्थाले आयोजना गरेको पालिका स्तरीय खुला तीज गीत प्रतियोगिता र महिलाहरूको लठो तान्ने प्रतियोगिता हजारौंको उपस्थितिमा सम्पन्न भएको हो ।
मेलाको उद्घाटन राष्ट्रिय सभा सदस्य मन रुपा शर्माले गर्नुभयो । शुभकामना मन्तव्य राख्दै शर्माले २०६४ सालदेखि निरन्तर यस क्षेत्रवासीबाट पाएको विश्वास र मायाप्रति कृतज्ञता प्रकट गर्नुभयो । उहाँले विकासका काम भए पनि सडकको दुरावस्थाले यो क्षेत्रलाई अपेक्षित उचाइमा पुग्न नसकेको बताउँदै निरन्तर पहल गर्ने प्रतिबद्धता जनाउनुभयो ।
कार्यक्रमलाई सम्बोधन गर्दै जलजला गाउँपालिका अध्यक्ष राजु प्रसाद आचार्यले एउटा टोल विकास संस्थाले आयोजना गरेको यस्तो भव्य कार्यक्रम प्रशंसनीय रहेको बताउँदै गाउँपालिकाले निरन्तर सहयोग गर्ने आश्वासन दिनुभयो ।
प्रतियोगितातर्फ तीज गीत प्रतियोगितामा गुन्थले टोल विकास संस्था ओखरेनी प्रथम, ठाडो टोल विकास संस्था नाग्लिबाङ द्वितीय, हम्पाल टोल विकास संस्था तृतीय र जनजागरण टोल विकास संस्था सान्त्वना बनेका छन् । विजेताहरूले नगद १२ हजार, ९ हजार, ६ हजार र ३ हजारसहित प्रमाणपत्र प्राप्त गरेका छन् ।
महिलाहरूको लठो तान्ने प्रतियोगितामा संहेले टोल विकास संस्था विजेता र गुन्थले टोल विकास संस्था उपविजेता भएका छन् ।
मेलामा कलाकार अनिल चापागाई, कृष्ण जिसी, नारायण पुर्जालगायतले आकर्षक प्रस्तुति दिएका थिए । कार्यक्रम संस्थाका सचिव ध्रुव मल्लको सञ्चालन, सदस्य रामजी सुवेदीको स्वागत र कपिलमणि सुवेदीको अध्यक्षतामा सम्पन्न भएको हो ।
