जलजलाको लेकफाँट र सालिजामा एमालेको वडा पार्टी कार्यालय स्थापना

जलजला, चैत- २१,  उत्तरी पर्वतको  जलजला गाउँपालिकाको वडा नम्बर ५ लेकफाँट र ६ सालिजामा एमाले वडा पार्टी कार्यालय स्थापना गरिएको छ । नेपाल कम्युनिष्ट पार्टी एमाले  जलजला गाउँपालिका कमिटीले आगमी वैशाख ३० गते हुने स्थानीय तह निर्वाचन लक्षित चुनावी कार्यक्रमलाई तीव्रता दिएको हो ।चुनावी  कार्यक्रम लिएर गाउँगाउँ  पुगेको एमालेले वडा कमिटीको वैठक,कार्यालय स्थापना र टोलभेला तथा मतदाता भेटघाट लगायतका चुनावी कार्यक्रम गरिरहेको छ ।

सोमबार  लेकफाँटमा पार्टी कार्यालय उद्घाटन गर्नुहुँदै नेकपा एमाले गण्डकी प्रदेशका सचिवालय सदस्य मेघनाथ सुवेदीले जनताका पक्षका काम गरेकाले स्थानीय तह निर्वाचनमा एमालेलाई जनताले विजयी गराउने दावी गर्नुभयो । एमाले विरुद्ध जति दल मिलेर आएपनि उनीहरुलाई परास्त गर्न एमाले सक्षम रहेको उहाँको भनाई थियो ।

वडा नं ६  सालिजाको वडा पार्टी कार्यालयको उदघाटन गर्नुहुँदै नेकपा एमालेका केन्द्रिय सदस्य तथा सांसद पदम गिरीले आगमी स्थानीय तह निर्वाचनमा सत्तारुढ दलहरुको गठबन्धनलाई जनताले परास्त गरिदिने बताउनुभयो । भएरका दलहरु एमाले विरुद्ध गठबन्धन गरेर आएपनि जनताले उनीहरुलाई पराजित गरिदिने उहाँको भनाई थियो । सांसद गिरीले सालिजा र लेकफाँटका जनतासँग स्थानीय समस्याका वारेमा अन्तरक्रिया पनि गर्नुभएको छ ।

यसैगरी सोमबार नै लेकफाँट र सालिजामा पार्टीका अगुवा कार्यकर्ताहरुलाई निर्वाचन लक्षित प्रशिक्षण दिइएको छ । कार्यक्रममा प्रदेश कमिटीका सदस्यहरु यज्ञ सुवेदी,नरबहादुर कार्की,जिल्ला कमिटिका सचिवालय सदस्य टुंगनाथ पौडेल,लोकनाथ रेग्मी,पालिका कमिटीका अध्यक्ष लालबहादुर अधिकारी लगायत जिल्ला तथा पालिका कमिटीका सदस्यहरु र वडा कमिटीका पदाधिकारीहरुको सहभागिता रहेको थियो । यसअघि एमालेले जलजलाका १ वासखर्क, मल्लाजका २,३ र ४ नम्बर वडामा पार्टी कार्यालय स्थापना गरीसकेको छ ।