म्याग्दी, असार-८, गैह्रसरकारी संस्था महासंघ नेपाल जिल्ला शाखा म्याग्दीले जिल्लामा कार्यक्रम सञ्चालन गर्दा महासंघको सिफारिसमा गर्नुपर्ने माग गरेको छ । मङ्गलबार गैसस म्याग्दीको आयोजनामा सम्पन्न भर्चुअल माध्यमको कार्यक्रमपछि महासंघले एक विज्ञप्ति जारी गर्दै यस्तो बताएको हो ।
अन्तर्राष्ट्रिय गैससहरुले स्थानीयस्तरमा कार्यक्रम सञ्चालन गर्ने, कार्यालय राख्ने तर बोर्ड नराख्ने जस्ता कार्यहरु गरेको पाइएको गैरसरकारी संस्था महासंघ म्याग्दीले विज्ञप्तिमा जनाएको छ । म्याग्दी जिल्लामा कार्यरत तथा अब भित्रिने सबै अन्तर्राष्ट्रिय गैससहरुलाई अनिवार्य रुपमा गैसस महासंघको कार्यक्रम सञ्चालन सिफारिस समेतमा स्थानीय गैससमार्फत मात्र सञ्चालन गर्ने व्यवस्थाका लागि सम्बद्ध सबै पक्षलाई अनुरोध गरिएको छ ।
हाल जिल्लामा सञ्चालनरत अन्तर्राष्ट्रिय गैससहरुलाई गैसस महासंघको सिफारिसमा स्थानीय गैससमार्फत कार्यक्रम सञ्चालनका लागि रुपान्तरित हुन अनुरोध गरिएको गैरसरकारी संस्था महासंघका जिल्ला अध्यक्ष दिपक पौडेलले हस्ताक्षर गरी जारी विज्ञप्तिमा उल्लेख गरिएको छ । गैसस महासंघको अनुरोधलाई वेवास्ता गरेको खण्डमा थप गतिविधि अगाडि बढाउन आफूहरु बाध्य हुने सो विज्ञप्तिमार्फत जनाइएको छ । साथै महामारीका रुपमा फैलिएको कोभिड–१९ को रोकथाम तथा न्युनीकरणमा प्रत्यक्ष र अप्रत्यक्ष संलग्न गैससकर्मीहरुलाई पनि यथाशीघ्र खोपको व्यवस्था गर्न नेपाल सरकारसमक्ष माग गरिएको छ ।
नेपालको संविधान तथा समाजकल्याण परिषदको ऐनमा समेत व्यवस्था भएअनुसार नेपालमा कार्यरत अन्तर्राष्ट्रिय गैससहरुले समाजकल्याण परिषदको स्वीकृतीमा स्थानीयस्तरमा स्थानीय सामाजिक संघसंस्थासँगको सहकार्यमा कार्यक्रम सञ्चालन गर्नुपर्ने प्रावधान रहेको विज्ञप्तिमा उल्लेख छ । यस्तो व्यवस्था हुँदा पनि म्याग्दीमा सञ्चालित केही गैससहरुले आफ्नो हिसाबले कार्यक्रम गरिरहेको गैसस महासंघको भनाइ छ ।
