जलजला, जेठ-१६, जल तथा मौसम विज्ञान विभागले आज शुक्रबार जारी गरेको बुलेटिनअनुसार नेपालमा यसपालिको मनसुन सरदरभन्दा १५ दिन अगावै नै प्रवेश गरेको छ। विभागका अनुसार हिजो रातिबाटै नेपालको पूर्वी भागबाट मनसुन भित्रिएर कोशी प्रदेशका अधिकांश क्षेत्रहरूमा फैलिइसकेको छ।
मनसुनको यो प्रारम्भिक प्रभावका कारण कोशी प्रदेशका विभिन्न मौसम केन्द्रहरूमा हल्कादेखि मध्यम वर्षा भइरहेको छ। सामान्यतया नेपालमा मनसुन भित्रने सरदर मिति जुन १३ तारिख अर्थात् जेठ ३० गते हुन्छ। तर यस पटक त्यो मितिभन्दा पूरै १५ दिन अगावै नै मनसुन प्रवेश गरेको हो।
नेपालमा सन् १९६८ देखि वैज्ञानिक विधिबाट वर्षा मापन गर्न थालिएको इतिहास छ। त्यसयताकै सबैभन्दा छिटो मनसुन प्रवेश यसै पटक भएको हो। यसअघि सबैभन्दा छिटो मनसुन भित्रिएको रेकर्ड सन् १९९६ मे ३१ तारिखको थियो।
मौसम विज्ञान विभागका अनुसार नेपालका अन्य भू-भागहरूमा मनसुन क्रमशः विस्तार हुँदै जानेछ। तर सम्पूर्ण देशमा मनसुन फैलिन केही समय लाग्ने अनुमान गरिएको छ।
यो समयमै मनसुन प्रवेशले किसानहरूलाई धान रोपाइँका लागि उपयुक्त वातावरण प्रदान गर्नेछ। तर अचानक आएको वर्षाका कारण सतर्कता अपनाउन आवश्यक छ।
मौसम विभागले आगामी दिनहरूमा मनसुनी गतिविधिबारे नियमित जानकारी प्रदान गर्ने जनाएको छ।
