देवी जी.सी./जलजला, भदौ-१०, पर्बतको मल्लाज स्थित महिला चेतना केन्द्रले नौमती बाजा तालिम शुरु गरेको छ । पर्बतको जलजला गाउँपालिका-३ मल्लाज स्थित महिला चेतना केन्द्रद्वारा महिलाहरुका लागी १० दिने नौमती बाजा तालिम आज आइतबार एक कार्यक्रमका बीच उद्घाटन गरिएको हो ।
तालिमको उद्घाटन गर्दै वडा नं ३ का अध्यक्ष एकेन्द्र खत्रीले गर्दै कुनैपनि सिप सानो नहुने र सिप सिकेर त्यसलाई आयार्जनामा समेत जोड्न सकिने बताउनुभयो । उहाँले पुजा आजा, बिबाह ब्रतबन्ध लगायतका शुभकार्यमा प्रयोग हुने नौमती बाजाको संरक्षण र उक्त सीपलाई हस्तान्तरण गर्ने उद्देश्यका साथ् तालिम आयोजना गरेकोमा आमा समुहलाई धन्यबाद दिनुभयो ।
संचारिका समूह म्याग्दीका अध्यक्ष देवी जिसीले कुनै समय नौमती/पन्चेबाजा दमाइ जातिले बजाउने र त्यसलाई हेय भावले हेर्ने गरिन्थ्यो तर अहिले तिनै जातिबाट प्रशिक्षण लिएर अन्य जातिले पनि बजाउने गरेका छन् । अझै महिलाले समेत यसरी सिकेर बजाउदा सिप सिक्ने मात्र नभई नौमती बाजाको संरक्षण, सिपको हस्तान्तरण र मौलिक संस्कृतिको संरक्षण साथै उच्च सम्मान भएको बताउनुभयो ।
कार्यक्रममा वडा नं ४ का वडा सदस्य शान्ती नेपाली, वडा नं २ बात जुना खत्री, वडा नं ३ का सदस्य सुनिता खत्री, साना किसान तथा सहकारी संस्था मल्लाजाका प्रबन्धक सनिता कार्की लगायतले मन्तब्य ब्यक्त गर्दै एक उत्कृष्ट कार्यक्रमको आयोजना गरेकोमा आमासमुहलाई धन्यबाद र कार्यक्रमको सफलताको शुभकामना दिनु भयो ।
प्रशिक्षार्थीको तर्फबाट इन्दिरा पौडेलले मन्तब्य ब्यक्त गर्दै आफुले तालिम लिएपछि त्यसलाई ब्यबसायिकतामा जोड दिने बताउनुभयो । प्रशिक्षकको तर्फबाट मन्तब्य ब्यक्त गर्दै धनबिर नेपालीले आफ्नो जातिले पुस्तौदेखी नौमती बाजा बजाउदै आएको, शुभकार्यमा, पुजा-आजा, बिहे ब्रतबन्धमा बाजाको प्रयोग गरेपनि बजाउनेलाई सधै हेय भावले हेर्ने अबस्था भोगेको र अहिले आएर यसरी बाजा अरुले पनि बजाउदा आफ्नो सिपको महत्व बुझेको बताउनुभयो । उहाँले सिक्न गाह्रो हुन सक्छ तर गाह्रो भएपनि जसरी भएपनि सिकाएर छोड्ने प्रतिबद्दता समेत ब्यक्त गर्नु भयो ।
तालिम उद्घाटन कार्यक्रम महिला चेतना केन्द्रका अध्यक्ष शान्ती जिसीको अध्यक्षता, र सहसचिव ज्योति मल्लको स्वागत र सचिव मिना खत्रीको संचालनमा सम्पन्न भएको थियो ।
