म्याग्दी, साउन-११, म्याग्दीको बरंग्जा स्थित पुर्व विद्यार्थी क्लवले ऐतिहासिक चिनाकोट दरवारक्षेत्र सरसफाई गरेको छ । जिल्लाको मंगला गाउँपालिका बरंग्जा स्थित स्थलमा महेन्द्ररत्न माध्यमिक विद्यालयको पुर्व विद्यार्थी क्लवले सरसफाई गरेको हो। क्लवका अध्यक्ष प्रकाश सापकोटाको नेतृत्वमा क्लवका पदाधिकारी तथा सदस्यहरुले चिनाकोट वरपर फालेका फोहोर संकलन तथा दरबाको भग्नावशेष रहेको क्षेत्रमा पुग्ने बाटोको सरसफाई गरेका हुन् ।
ऐतिहासिक महत्वको पर्यटकीय स्थल चिनाकोटको पर्यटन पर्बर्द्धनका लागी प्रचार प्रसार र त्यहाँ पुगेका पर्यटकले फालेका प्लास्टिक जन्य फोहोर ब्यबस्थापन गर्न सरसफाई कार्यक्रम गरिएको क्लवका सचिव गंगा बहादुर खत्री गणेशले बताउनुभयो । पछिल्लो समयमा होमस्टे र सुर्योदय अनि हिमाली दृश्य हेर्न धेरैको रोजाइको क्षेत्र बनेको झाक्रेपानीबाट ४५ मिनेटमा चिनाकोट पुग्न सकिन्छ भने बरंग्जाको आर्रभांग र खानीगाउँ हुदै चिनाकोट सजिलै पुग्न सकिन्छ । त्यसैगरी म्याग्दीको सदरमुकाम बेनी-तातोपानी- मसार र पखेर हुदै बाहुन पँधेराबाट पनि सो क्षेत्रमा पुग्न सकिन्छ । सो क्षेत्रमा जंगली केरा लगायतका बनस्पति पनि पाइने भएकोले जंगली भालु समेत देखेको महेन्द्ररत्न माविका पुर्व शिक्षक कृष्ण जिसीले बताए ।
बाइसे-चौबिसे राज्यका पालामा सेनाको टुकडी रहेको सो क्षेत्रमा दरबार र किलाको भग्नावशेष समेत देख्न सकिन्छ । सो क्षेत्रमा अवलोकन गर्दा रानीले कपाल कोर्ने ढुङ्गो निकै प्रख्यात छ । अहिले सो क्षेत्रमा बरंग्जाको खानिगाउँ नजिकैबाट पैदल मार्ग र झाक्रीपानिबाट समेत पैदल मार्ग बनेकोले पर्यटकहरुलाई सहज भएको छ ।
ऐतिहासिक स्थलको प्रबर्धन गर्न समेत सघाउ पुगोस भन्ने उद्देश्यले सरसफाई संगै प्रचारत्मक कार्यक्रम गरिएको क्लबका अध्यक्ष प्रकाश सापकोटाले बताउनुभयो । सरसफाई कार्यक्रममा क्लवका पदाधिकारी, सदस्यहरु र महेन्द्ररत्न माविका पुर्व बिद्यार्थीहरु सहभागी भएका थिए ।
